Il-Ministru Franċiż għall-Intern, Bernard Cazeneuve, żvela, waqt konferenza tal-aħbarijiet, li seba’ persuni b’rabtiet man-networks terroristiċi spiċċaw arrestati fi Franza, matul dan ix-xahar. Hu qal ukoll li talanqas tlieta mill-arrestati kienu qed jippjanaw l-attakki speċifiċi fl-artjiet Franċiżi.
Waqt il-konferenza, Cazeneuve saħaq li l-awtoritajiet Franċiżi, fl-ewwel sitt xhur tal-2016, irnexxielhom jarrestaw aktar persuni b’rabtiet mat-terroriżmu milli kienu arrestaw matul is-sena l-oħra. Madankollu, il-Ministru ma żvelax dettalji dwar l-arresti ta’ dan ix-xahar f’pajjiżu.
Sadanittant, statistika minn Franza uriet li l-aħħar attakki terroristiċi mill-militanti Iżlamiċi (fil-pajjiż), flimkien mal-azzjonijiet industrijali u l-inċidenzi ta’ għargħar kellhom jagħtu daqqa kbira ‘l isfel lit-turiżmu lejn Pariġi.
Skont l-istatistika, kienu rreġistrati miljun anqas turist bejn Jannar u Ġunju, meta mqabbel mal-istess perjodu ta’ żmien matul l-2015. It-tnaqqis hu ekwivalenti għal 6.2 fil-mija waqt li hu kkalkulat li l-industrija tat-turiżmu għar-reġjun ta’ Pariġi tilfet madwar 750 miljun ewro f’introjtu.
L-uffiċjali qed ifissru dan it-telf ta’ flus bħala ‘diżastru industrijali’ peress li Franza tiddependi ħafna mit-turiżmu. Dan meta Pariġi is-soltu tilqa’ madwar 16 il-miljun turist fis-sena, waqt li hi magħrufa fost l-aktar destinazzjonijiet popolari fid-dinja.
