Sriebet ta’ trakkijiet u persuni li ffurmaw ‘ktajjen umani’ qalb it-toroq madwar il-port ta’ Calais ikkaġunaw taqlib u konfużjoni kbira għall-madwar u l-arterji taz-zona, fejn il-movimenti saru ‘diffiċli’, fost it-tensjoni.
Id-dimostranti kienu qed jinsistu biex jingħalaq il-kamp għall-immigranti f’Calais, li hu mlaqqam ‘il-Ġungla’ – bis-Sindku ta’ Calais, Natacha Bouchart, tissieħeb mad-dimostranti fil-protesti dwar dan il-kamp ‘li qed jiswa ta’ ħsara lill-belt minbarra li joħloq il-kaos fl-inħawi tal-port’.
Illum hemm ’il fuq minn 7,000 resident fil-‘Ġungla’ li qegħdin jgħixu f’kundizzjonijiet skwallidi għall-aħħar. Dan meta ħafna mill-immigranti f’Calais qegħdin jippruvaw jitilgħu fuq it-trakkijiet fiz-zona f’tentattivi ddisprati ‘biex jaqsmu minn Franza lejn ir-Renju Unit’.
Issa, Natacha Bouchart qalet li s-sitwazzjoni f’Calais saret intollerabbli. Dan waqt li sidien tal-ħwienet lokali, Pulizija, membri tal-unions u bdiewa ssieħbu mas-sewwieqa tat-trakkijiet li, ilbieraħ, kienu qed jimblukkaw it-triq prinċipali viċin il-port. Il-protesta kienet anki l-akbar waħda ta’ dan it-tip kontra l-kamp tal-inħawi.
