Il-Pulizija qed tinvestiga mewta ta’ pazjent li kien qed jingħata l-kura fl-isptar Monte Karmeli. Il-pazjent miet l-isptar Mater Dei wara li kellu jingħata l-ewwel għajnuna fl-isptar Monte Karmeli.
Fi stqarrija, il-Gvern qal li l-awtoritajiet fl-isptar Monte Karmeli ġew infurmati li f’sala ta’ dan l-isptar kien hemm pazjent li kellu jingħata l-ewwel għajnuna. Fuq il-post, madanakollu, kellha tissejjaħ ambulanza li ħadet lill-pazjent l-isptar Mater Dei, fejn kien ċertifikat mejjet ftit tal-ħin wara.
F’Jannar ta’ din is-sena, kellha tiġi kkummissjonata inkjesta interna wara l-mewt ta’ raġel ta’ 45 sena li kien qed jinżamm fl-isptar Monte Karmeli taħt il-kustodja tal-Pulizija. F’dan il-każ, kien hemm suspett qawwi li r-raġel miet f’suwiċidju, madanakollu kellha ssir investigazzjoni biex tistabilixxi x’ġara.
Iżda fil-każ tal-lum, il-Gvern ma qalx x’wassal għall-mewt tal-pazjent. L-anqas ma ntqal jekk il-pazjent kienx taħt il-kustodja tal-Pulizija. Madanakollu, intqal li nħatret inkjesta interna biex tinvestiga. Dan apparti li qed issir investigazzjoni mill-Pulizija, li wkoll ġew infurmati bil-każ.
