L-Awtoritajiet Awstraljani qed jiddubitaw it-teorija li ‘seta qabad nar’ fuq l-ajruplan tal-Malaysian Airlines li kien għeb, f’Marzu tal-2014, waqt titjira minn Kuala Lumpur, fil-Malasja, lejn iċ-Ċina.
It-teorija kienet li n-nirien qabdu ‘qabel l-ajruplan – Titjira MH370 – sparixxa minn fuq l-iskrins tar-radar’. Dan meta, aktar kmieni dan ix-xahar, kienu rkuprati ħames ‘partijiet’ li dehru maħruqin minn zona fil-Madagascar.
Madankollu, l-awtoritajiet qed jgħidu li mhemmx il-provi, s’issa, li d-debris għandu x’jaqsam mal-ajruplan tal-Malaysian Airlines. Ingħad ukoll li numru ta’ marki suwed fuq il-partijiet skrutinizzati kienu dovuti ‘għal reżina u mhux nirien’.
It-Titjira MH370 kellha 239 persuna abbord meta sparixxiet f’nofs il-vjaġġ, fl-2014. Intant, l-awtoritajiet jaħsbu li l-ajruplan Malasjan, li kien qed jivvjaġġa lejn Beijing, iġġarraf direttament f’zona lejn in-nofsinhar tal-Oċean Indjan wara li tilef il-kontroll.
Il-ħames partijiet li kienu rkuprati qrib Sainte Luce, fl-inħawi ta’ Madagascar lejn il-Grigal, instabu minn Blaine Gibson, li qed jiddedika ħafna ħin għat-tfittxija u li, qabel, kien sab partijiet oħra tal-ajruplan. Almenu żewġ partijiet indikaw ‘sinjali ta’ ħruq’ li fi kliem l-esperti jistgħu – jekk kemm-il darba jkunu kkonfermati — jipprovdu aktar tagħrif dwar x’seħħ ‘tassew’ waqt Titjira MH370.
Madankollu, il-Ministru Awstraljan għat-Trasport, Darren Chester, qal, ilbieraħ, li investigazzjoni inizjali qed turi li ‘kuntrarju għall-ispekulazzjoni, ma jeżistu l-ebda provi li l-partijiet inkwistjoni kienu esposti għas-sħana jew xi inċidenza ta’ nirien’.
L-Awstralja qed tmexxi t-tfittxija għall-ajruplan Malasjan nieqes, fejn qed tuża d-drones għal taħt l-oċean flimkien ma’ tagħmir tat-tip sonar li jitħaddem minn bastimenti speċjalizzati.
It-tfittxija intensiva fis-search zone indikat tal-Oċean Indjan qed tinvolvi wkoll lill-Malasja u ċ-Ċina, iżda l-pajjiżi qablu li, fl-assenza ta’ ‘informazzjoni kredibbli ġdida’, l-impenn li ilu għal dawn ix-xhur kollha mistenni jikkonkludi qabel tmiem is-sena.
