Il-Parlament Ewropew li, illum, iltaqa’ fi Strasbourg (Franza), appoġġja r-ratifika tal-Ftehim dwar il-Klima ta’ Pariġi, biex b’hekk witta t-triq għall-ewwel patt fuq livell globali f’dan is-settur delikat.
Il-ftehim jaħseb biex jillimita l-emissjonijiet tal-gassijiet greenhouse u biex iż-żidiet fit-temperatura globali jinżammu ’l isfel sew minn 2˚C.
Intant, il-ftehim kien approvat b’610 voti favur, bi 38 vot kontra u b’31 deputat jastjenu.
Il-vot, li kien preżenti għalih is-Segretarju Ġenerali tan-Nazzjonijiet Uniti, Ban Ki-moon, jiftaħ għall-infurzar tal-ftehim fuq livell dinji – bil-Ministri tal-pajjiżi partikulari, issa, jistgħu jirratifikaw il-ftehim għan-nom tal-UE aktar ’il quddiem din il-ġimgħa.
It-Trattat, biex jidħol fis-seħħ mil-lat globali, jeħtieġ li tal-anqas 55 pajjiż li jirrappreżentaw almenu 55 fil-mija tal-emissjonijiet globali, jikkonkludu l-passi kollha neċessarji.
Min-naħa tiegħu, Ban Ki-moon esprima sodisfazzjon li seta’ jkun preżenti għall-‘mument storiku’ fi Strasbourg. Fl-istess ħin, is-Segretarju Ġenerali tan-NU hu fiduċjuż li, bl-impenn tal-Parlament Ewropew, ‘se jkunu jistgħu jilħqu t-threshold tal-55 fil-mija fi kwistjoni ta’ ġranet.’
