Daħlet fis-seħħ il-‘verżjoni msaħħa’ tal-qawwa li tħares il-fruntieri tal-UE, meta l-Ewropa qed tipprova ssib strateġija magħquda biex tieħu ħsieb l-agħar kriżi tal-immigranti minn wara t-Tieni Gwerra Dinjija.
Uffiċjali tal-UE kellhom jinawguraw it-task force ġdid fl-inħawi taċ-checkpoint ta’ Kapitan Andreevo, mal-fruntiera bejn il-Bulgarija u t-Turkija. Dan hu l-punt ta’ aċċess ewlieni li l-immigranti qed jużaw fit-tentattivi tagħhom biex jidħlu f’territorji tal-UE mingħajr ma jissugraw ħajjithom bil-vjaġġi mill-Mediterran.
Il-European Border and Coast Guard Agency (EBCG) se jkollha għad-dispożizzjoni tagħha xi 1,500 uffiċjal minn 19-il stati membri li jistgħu jkunu mobilizzati malajr, f’każi ta’ emerġenza – u fuq kollox f’sitwazzjonijiet fejn iseħħ xi influss f’daqqa ta’ immigranti.
L-aġenzija Frontex, ibbażata f’Varsavja fil-Polonja, is-sena l-oħra kienet inqabdet fuq sieq waħda fil-konfront tal-mijiet tal-eluf tan-nies li vvjaġġaw mill-Greċja, u tul l-hekk imsejħa rotta fil-Punent tal-Balkani, lejn l-Ewropa ta’ Fuq.
Minħabba l-limitazzjonijiet għall-poteri u l-istaff, il-Frontex ma setgħetx issegwi ronda effettiva tal-fruntieri esterni tal-Unjoni Ewropea, b’mod partikulari l-fruntieri tal-Greċja u l-Italja li jinsabu ‘fl-eqqel taz-zona tal-kriżi’ u li huma mira partikulari għall-immigranti li jridu jidħlu fl-Ewropa.
