Chelsea għandhom bżonn jakkwistaw it-tlett punti ġaladarba Antonio Conte irid imewwet l-għajdut li qiegħed fuq xifer diżastru.
Dan hekk kif illum wara nofsinhar il-Blues mistennija jilqgħu f’darhom lill-Leicester City, fejn rebħa għaċ-Chelsea tista twassalhom mal-ewwel erbgħa tal-klassifika wara li sabu ruħhom fil-pożizzjoni deludenti tas-seba’ post.
Il-kowċ ta’ Leicester City kif ukoll l-ex kowċ ta’ Chelsea, Claudio Ranieri, saħaq li qalbu dejjem ser tibqa’ marbuta mat-tim ta’ Londra u insista li l-plejers tal-Blues għandhom jisimgħu u jkollhom fiduċja għamja f’Conte l-għaliex jaf x’inhu jagħmel.
Sadanittant illum Pedro mistenni jieħu post Willian wara li l-Brażiljan kellu jmur lura f’pajjiżu minħabba li kellu mewt fil-familja filwaqt li John Terry mistenni jibda minn mas-sostituti kawża ta’ injury fl-għaksa.
Minn naħa l-oħra Claudio Ranieri mistenni jżomm lil Danny Simpson, Riyhad Mahrez u Islam Slimani fuq il-bank tas-sostituti sabiex iserraħhom għaċ-Champions League, hekk kif nhar it-Tlieta l-Foxes mistennija jilqgħu f’darhom lid-Daniżi tal-FC Koebenhavn.
