Il-kumpannija BASF mistennija żżomm it-taqsimiet għall-produzzjoni tagħha magħluqin għat-tul taż-żmien fil-faċilità ta’ Ludwigshafen fejn splużjoni u nirien kbar, ilbieraħ, swew il-ħajja ta’ żewġ ħaddiema waqt li ħallew għexieren ta’ midruba.
Il-faċilità tal-BASF hi fost l-akbar kumplessi kimiċi fid-dinja u l-inċident qajjem tħassib sostanzjali fost ir-residenti taz-zona. L-isplużjoni hi problema enormi għall-BASF, li għandha reputazzjoni globali bħala produttur tal-kimika, u li ppruvat li setgħet biex jonqsu l-inċidenti fuq is-sit filwaqt li rrevediet il-miżuri għall-ħarsien tas-saħħa u s-sigurtà,
Intant, l-awtoritajiet għadhom għaddejjin bl-investigazzjonijiet dwar l-isplużjoni, b’kelliema għall-kumpanija BASF qed jeskludu għall-possibbiltà ta’ terroriżmu.
L-isplużjoni tat-Tnejn seħħet f’port viċin ta’ xmara fejn is-soltu jħottu l-liquid gas u materjal ieħor li kapaċi jaqbad malajr. Sadattant, in-nirien li rriżultaw, b’xorti tajba, ma nfirxux għal bnadi oħra tal-impjant.
Fil-minuti wara l-isplużjoni, il-pulizija f’Ludwigshafen avżaw lir-residenti tal-belt u fl-inħawi ta’ Mannheim, fil-viċinanzi, biex jibqgħu ġewwa minħabba l-possibbiltà kbira ta’ kimiċi velenuzi fl-ajru u meta kienu telgħin id-dħaħen kbar mis-sit tal-inċident. Kien hemm ukoll rapporti dwar residenti fiz-zoni qrib l-impjant li ilmentaw dwar problemi tan-nifs, anki wara li n-nirien kienu kkontrollati.
Analisti qalu li, għalissa, diffiċli biex wieħed jikkwantifika l-impatt sħiħ tal-isplużjoni u n-nirien fl-impjant ta’ Ludwigshafen. Dan meta l-ġbir ta’ dettalji u provi jinvolvi impenn fit-tul li jista’ jdum għal ġimgħat u anki xhur.
