Stewart Said
It-tim nazzjonali Malti tar-Rugby kiseb it-tieni rebħa minn żewġ partiti meta fil-Hibernians Stadium għeleb lil Ċipru 31-3 f’temp tipiku Xitwi. Din ir-rebħa waslet wara li l-ġimgħa l-oħra, it-tim Malti għeleb lil Andorra 63-15 fil-partita tal-ftuħ fir-Rugby Europe Conference 1 South.
Id-differenza bejn iż-żewġ timijiet dehret mill-ewwel minuti tal-logħba, bit-tim Malti jattakka għal ħinijiet twal, iżda l-elementi tar-riħ u x-xita ftit kienu ta’ għajnuna hekk kif il-plejers Maltin ma setgħux jixxutjaw.
Ċipru setgħu marru fil-vantaġġ fl-20 minuta, iżda Alex Zavallis falla l-mira, b’James Morris ifalli l-mira man-nofs siegħa logħob, kawża tar-riħ qawwi.
Iċ-Ċiprijotti marru fil-vantaġġ fis-36 minuta permezz ta’ penalty ta’ Zavallis. Iżda t-tim Malti għamel reazzjoni u ftit sekondi qabel il-mistrieħ skurja l-ewwel try tal-logħba minn pożizzjoni ċentrali permezz ta’ Daniel Holliday, b’James Morris ma jfallix il-conversion minn ftit metri bogħod.
Dawn is-seba’ punti kien ta’ ispirazzjoni għat-tim Malti hekk kif ħareġ fuq l-offensiva fit-tieni taqsima u wara tliet minuti James KIRK għamel try min-naħa leminija b’James MORRIS jżid żewġ punti mill-conversion biex għamel l-iskor 14-3.
It-tim ta’ Damian Neill kompla jattakka u fil-50 minuta rnexxielu jiskurja t-tielet try tal-partita, meta minn ballun li deher mitluf, James KIRK laħaq fil-ħin u poġġa l-ballun wara l-linja. Il-conversion reġa’ kien f’idejn James Morris li prova minn pożizzjoni angolata, iżda falla l-mira.
It-tim Malti kellu jagħmel għaxar minuti b’raġel anqas wara li Luke Watts ġie muri l-karta s-safra, iżda dan ma waqqafx lill-Maltin milli jkabbru l-iskor hekk kif fil-65 minuta kien Rory O’BRIEN li żied ħames punti oħra, iżda Morris naqas li jkompli jżid il-vantaġġ.
Lejn l-aħħar minuti tal-logħba, kien għad fadal ċans għal try ieħor Malti fuq in-naħa xellugija tal-pitch meta f’konfużjoni fejn it-try line, kien is-sostitut l-ieħor Dragan CERKETA li skurja l-ewwel try tiegħu fil-partita. Mill-conversion, kien is-solitu JAMES MORRIS li ma żbaljax biex għamel l-iskor finali 31-3.
