Il-Partit Laburista qed ikompli għaddej bil-kampanja ta’ gideb kontra l-avversarji politiċi tiegħu, issa dwar ix-Shadow Minister Claudio Grech.
Fi stqarrija l-Partit Nazzjonalista qal li Claudio Grech diġà qal li ma jiftakarx laqgħat bejnu u George Farrugia. Fil-fatt, dan il-fatt diġà kien ġie ddikjarat taħt ġurament quddiem il-Kumitat Parlamentari għall-Kontijiet Pubbliċi. Din hi l-verità u l-verità ma jdawwarha ħadd.
Anzi, x-xhieda tal-istess Farrugia quddiem il-Qorti tikkonferma li hu qatt ma talab xejn minn Claudio Grech u lanqas biss kien ċert jekk seħħitx laqgħa jew le aktar minn għaxar snin ilu, xi ħaġa li hi konsistenti max-xhieda ta’ Grech quddiem il-PAC. Fil-fatt ix-xhieda ta’ Farrugia faqgħet bużżieqa oħra tal-Partit Laburista li qed jibni l-aħħar montatura tiegħu biex issa jattakka lil Claudio Grech kif ilu jipprova jattakka numru ta’ Deputati u uffiċjali tal-Partit Nazzjonalista.
Jekk hemm xi ħadd li hu dgħajjef hu Joseph Muscat, li mhux kapaċi jieħu deċiżjoni kontra:
- Keith Schembri, li nqabad li fetaħ kumpanija sigrieta fil-Panama biex fiha jpoġġi miljun ewro fis-sena ġejjin mill-commissions;
- Konrad Mizzi, li nqabad li fetaħ kumpanija sigrieta fil-Panama biex fiha jpoġġi miljun ewro fis-sena ġejjin mill-commissions;
- Chris Cadona, li gideb dwar il-preżenza tiegħu f’burdell fil-Ġermanja, u ordna li jinfetħu mandati ta’ sekwestru kontra l-ġurnalista li kixfitu;
- Evarist Bartolo, li l-canvaser tiegħu kien involut fi skandlu ta’ korruzzjoni, u li hu kien qed jgħattilu;
- Owen Bonnici, li ħatar lis-sieħba tiegħu f’bord pubbliku;
- Carmelo Abela, li nqabad li kien għaddej pjan biex jinħoloq job għal qarib ta’ membru tas-Segretarjat tiegħu;
u ħafna Ministri u Segretarji Parlamentari oħra li huma nvoluti f’diversi skandli.
