Dorianne Camilleri ta’ 34 sena ġiet ikkundannata ħames snin ħabs wara li nstabet ħatja li tajret żewġt aħwa anzjani li rriżultat fi qtiel involontarju ta’ wieħed minnhom, Alfred Zahra mill-Imsida. Apparti minn hekk, hi nstabet ħatja li kkawżat ġrieħi gravi fuq oħtu Carmela Zahra.
L-inċident seħħ f’Mejju tal-2011 f’Ħ’Attard meta Camilleri kienet qed issuq lura d-dar wara x-xogħol. L-unika xhud f’dan il-każ kienet l-akkużata stess peress li l-anzjan miet wara jumejn mill-inċident u l-anzjana ma tiftakarx x’ġara eżatt. Għalkemm il-Qorti ma emmnitx li l-mara kienet qed issuq b’veloċità baxxa, il-Qorti qablet li l-anzjani ma qasmux minn post addattat.
Apparti s-sentenza ta’ priġunerija, il-Qorti ordnat ukoll li tittieħed il-liċenjza tas-sewqan ta’ Dorianne Camilleri u ordnat ħlas ta’ €2,400 fi spejjeż tal-Qorti.
