Il-Viċi-President tal-Istati Uniti, Mike Pence, qal, waqt diskors fi Brussell, li l-Istati Uniti, taħt it-tmexxija tal-President Donald Trump, għadha impenjata għall-koperazzjoni u sħubija mal-Unjoni Ewropea.
Dan waqt li Pence ipprova jserraħ ras l-Alleati Ewropej ta’ Washington, li qed jinkwetaw dwar uħud mill-aħħar kummenti kontroversjali min-naħa tal-President Trump fejn hu, fost oħrajn, kien tkellem dwar il-Brexit (it-tluq tar-Renju Unit mill-UE) u r-rwol tal-Alleanza tan-NATO.
Donald Tusk, bħala l-President tal-Kunsill Ewropew, qal li l-UE qed tiddependi mill-appoġġ ‘inekwivoku’ tal-Amerikani għal Ewropa magħquda.
Min-naħa tiegħu, il-Viċi-President Pence – li kellu wkoll taħditiet mal-President tal-Kummissjoni Ewropea, Jean-Claude Juncker – qal li kien il-President Trump li ‘talbu biex jivvjaġġa lejn Brussell’.
Sadanittant, Juncker qal li l-Istati Uniti ‘teħtieġ Unjoni Ewropea magħquda u b’saħħitha’, waqt li sostna li ‘issa mhux iż-żmien biex l-Ewropa tinqasam f’kategoriji nazzjonali u provinċjali bħalma kienu jeżistu qabel’.
Fl-istess ħin, Donald Tusk qal li l-laqgħat ma’ Mike Pence kienu ‘meħtieġa tassew’ wara li t-Tmexxija ġdida f’Washington esprimiet ‘diversi opinjonijiet sorprendenti’. Tusk anki ċaħad għall-idea ‘li n-NATO setgħet spiċċat żmienha’, b’referenza għad-diskors, ġimgħat ilu, min-naħa ta’ Donald Trump, fir-rigward tal-Alleanza tal-Punent.
