Ivan Portelli, li dan il-Gvern tah ħatra għolja fid-Dipartiment tat-Taxxi Interni, ta stqarrija bil-miktub lill-Kummissarju tat-Taxxi Interni Marvin Gaerty wara allegazzjonijiet serji fil-blog ta’ Daphne Caruana Galizia, li siefer maċ-Chairman tad-db Group, li qed jiġi investigat mill-istess Dipartiment minħabba l-involviment tiegħu fil-Panama Papers.
Kien il-Kummissarju tat-Taxxi Interni stess li kkonferma li hu rċieva l-istatement li talab mingħand Ivan Portelli. Kif kien qal l-istess Gaerty waqt il-programm Iswed fuq l-Abjad, issa l-istatement ingħadda għand is-Segretarju Permanenti fil-Ministeru ta’ Edward Scicluna.
Waqt il-programm immexxi minn Frank Psaila, Marvin Gaerty kien qal li meta hu kien infurmat bl-allegazzjonijiet dwar Ivan Portelli, li jaħdem fl-uffiċċju tal-Kummissarju tat-Taxxa fil-Furjana bħala direttur għad-Dwana, il-VAT u l-Inland Revenue, tkellem mas-Segretarju Permanenti u anke mal-Ministru tal-Finanzi Edward Scicluna.
Marvin Gaerty qal li l-Erbgħa stess kien iltaqa’ ma’ Ivan Portelli u talbu jagħti l-opinjoni tiegħu dwar dak li qed jingħad, għax kulħadd għandu dritt jispjega l-pożizzjoni tiegħu, u talbu wkoll jagħmel stqarrija bil-miktub dwar l-allegazzjonijiet li hemm fosthom jekk hux veru siefer maċ-Chairman ta’ db Group, u min ħallas għall-passaġġ u għall-akkomodazzjoni.
NET News hu infurmat li issa din l-istqarrija ingħaddiet lis-Segretarju Permanenti fil-Ministeru tal-Finanzi Alfred Camilleri. Filfatt, f’korrispondenza li għaddiet bejn il-preżentatur tal-programm Iswed fuq l-Abjad Frank Psaila u s-Segretarju Permanenti ta’ Edward Scicluna ikkonferma li rċieva l-istqarrija mingħand il-Kummissarju tat-Taxxi.
Alfred Camilleri qal li għadha qed tinġabar informazzjoni oħra importanti u relevanti imma apparti minn hekk, m’hemm xejn iktar x’jingħad.
Din l-aħbar qed tkompli tiżviluppa ma’ kull ġurnata li tgħaddi, hekk kif wieħed issa jistenna x’passi se jkunu qed jittieħdu mill-Ministru Edward Scicluna u mis-Segretarju Permanenti tiegħu dwar dan il-każ ladarba tinġabar l-informazzjoni kollha neċessarja.
