Li kieku mhux għax il-Gvern Laburista ta’ Joseph Muscat b’daqqa ta’ pinna u mingħajr ftehim ma’ ħadd ħassar l-elezzjonijiet tal-Kunsilli Lokali li kellhom isiru din is-sena kieku, llum, nofs il-popolazzjoni għandha d-dritt li, bħalma jiġri f’demokrazija normali, tmur u tivvota sabiex teleġġi l-Kunsill Lokali rispettiv tagħha.
David Agius il-Whip tal-Grupp Parlamentari Nazzjonalista u Kelliem għall-Gvern Lokali, iż-Żgħażagħ u l-Isport permezz tal-istqarrija maħruġa mill-Partit Nazzjonalista qal li Joseph Muscat qed jibża’ mill-vot ta’ nofs il-poplu Malti u Għawdxi, għal numru ta’ raġunijiet, fosthom li: ħafna Laburisti qed jgħidulu: inti ma tafhomx issa lill-ħaddiema għax imdawwar bil-korrotti f’Kastilja; n-nies jafu li dan l-Gvern qed iħalli lill-Kunsilli Lokali mingħajr finanzi fejn mhumiex ilaħħqu mal-bżonnijiet bażiċi li jridu jsiru fil-lokalità; in-nies jafu li dan hu l-aktar Gvern korrott fl-istorja ta pajjizna; n-nies qed jifhmu li f’pajjiżna hemm bżonn politika onesta u ta’ ġid għall-lokalitajiet; u n-nies qed jagħrfu t-tajjeb mill-ħażin.
Qed jibża’ Joseph Muscat li n-nies bil-vot tagħhom jgħidulu ferm aktar milli qalulu sentejn ilu.
Iżda kien f’Ġunju 2015 li il-Gvern Laburista ħassar dawn l-elezzjonijiet mingħajr konsultazzjoni jew ftehim sabiex l-elezzjonijiet tal-Kunsilli Lokali issa se jibdew isiru dejjem fid-dell ta’ l-elezzjonijiet tal-Parlament Ewropew.
Deċiżjoni li tfisser ukoll li nofs il-pajjiż issa se jkollu kunsilli li se jkunu qegħdin jaħdmu l-barra mit-terminu oriġinali tagħhom u dan b’detriment għall-istess Kunsilli Lokali li ċertament, bħalma jiġri f’kull demokrazija, jissaħħu permezz tal-leġitimità demokratika.
Il-mossa ta’ Ġunju 2015 kienet sabet, fost oħrajn, r-resistenza tal-Partit Nazzjonalista li sa mill-bidu nett kien wissa li din l-idea kienet se tkun mossa li ddgħajjef il-kunsilli lokali. Il-Gvern baqa’ għaddej u għamel ta’ rasu b’rabta mal-elezzjonijiet ta’ l-2017.
Għalhekk nofs il-pajjiż illum m’għandux id-dritt tal-vot għaliex b’daqqa ta’ pinna hekk iddeċieda Joseph Muscat f’Ġunju 2015. Illum, kellhom jivvutaw ir-residenti f’dawn il-lokalitajiet: Bormla, Ħaż-Żabbar, iż-Żejtun, iz-Xgħajra, il-Kalkara, il-Fgura, Ħal Tarxien, Ħal Għaxaq, il-Gudja, l-Imqabba, il-Qrendi, l-Pietà, Santa Venera, Ħal Lija, Birkirkara, r-Rabat, l-Imtarfa, l-Imdina, San Ġwann, Tas-Sliema, Pembroke, Ta’ Xbiex, il-Belt Valletta, l-Imsida, l-Imġarr, l-Mellieħa, n-Naxxar, u f’Għawdex: ir-Rabat, il-Fontana, l-Għarb, l-Għasri, Ta’ Sannat, u x-Xewkija.
Dan juri kemm Joseph Muscat qed jibża’ mill-vot tal-poplu.
