Il-Kumitat għall-Kotijiet Pubbliċi llejla talab lill-Awditur Ġenerali biex jinvestiga ittra li l-Kap tal-Oppozizzjoni Simon Busuttil bagħat b’rabta mal-għoti tal-art tal-ITS lil grupp db.
Fl-ittra lill-Awditur Ġenerali, Simon Busuttil kien hemm sensiela ta’ mistoqsijiet li jqumu dwar dan it-trasferiment. Fosthom il-fatt li dan is-sit jinsab f’żona prime site, ġie trasferit għall-prezz baxx ta’ €15-il miljun meta huwa stmat ferm aktar, kif ukoll għall-fatt li dan il-kuntratt ma tteħidx fil-Parlament għall-approvazzjoni.
Il-Kap tal-Partit Nazzjonalista saqsa jekk il-proċess tat-trasferiment tal-art sarx skont il-prinċipji ta’ governanza tajba. Saqsa wkoll jekk sarx bi trasparenza u ekwità u jekk il-proċess assigurax li l-offerenti ġew trattati b’mod ugwali.
Saqsa wkoll jekk ġewx imħarsa r-regolamenti dwar l-akkwist pubbliku u wkoll jekk ġewx imħarsa ir-regolament dwar l-akkwist Pubbliku fid-Dispożizzjonijiet Ġenerali.
Mistoqsija oħra li saret biex tkun investigata hi dik jekk kienx hemm negozjati bejn il-Gvern u DBSG wara li ġiet sottomessa l-offerta finali.
L-Aditur intalab jinvestiga wkoll jekk il-Poplu Malti ġabx l-aħjar dħul possibli minn dan is-sit ta’ valur għoli ħafna meta wieħed iqis li jifforma parti mill-Golden Mile ta’ Malta. Jekk dan il-proġett hux se jesponi jesponi lit-taxpayer Malti għal telf materjali u dan minħabba li r-rilokazzjoni tal-ITS lejn Smart City se tiswa lill-Gvern minimu ta’€74 miljun ammont li hu ferm ogħla mill-€15-il miljun li l-offerent se jħallas lill-Gvern.
Mistoqsija oħra għall-investigazzjoni hi jekk l-andament u l-proċedura addotttati fil-proċess kollu li wassal għall-kuntratt hu l-fatt li Projects Malta Ltd. m’għandhiex l-istanding neċessarju fil-liġi biex toħroġ, tevalwa u taġġudika RFP waħedha mingħajr l-involviment tad-dipartiment tal-kuntratti, għalhekk l-awditur intalab jara jekk il-proċess hux wieħed ivvizjat.
Il-Kap tal-Oppożizzjoni Simon Busuttil talab ukoll lill-awditur biex jivverifika jekk it-trasferiment osservax il-provedimenti ta’ kapitlu 268 fl-Att dwar it-trasferimenti tal-Artijiet tal-Gvern.
