Fil-konfront delikat ta’ nofs il-klassifika bejn Msida SJ u Sliema Wanderers, tal-aħħar marru l-aħjar wara li kisbu tliet punti importanti biex komplew joqorbu aktar mal-ewwel ħames timijiet.
Fl-ewwel taqsima Sliema mill-ewwel dehru awtorevoli meta wara biss żewġ minuti fetħu l-iskor permezz ta’ Darren Aitchinson. Seba’ minuti wara kien Uron Markovic li rdoppja l-iskor biex fl-aħħar minuta tal-ewwel taqsima, Radovan Duric għamilhom 3-0.y
It-tieni taqsima kienet aktar bilanċjata u Msida naqsu l-iskor permezz tal-gowl ta’ Liam Cachia wara biss tliet minuti. Erba’ minuti mit-tmiem, George Frendo kompla jnaqqas id-distakk għall-Misidjani. Radovan Duric irnexxielu jgħaqqad doppjetta personali meta reġa’ skorja għal Sliema. Fl-aħħar minuta l-gowlkiper Bernard Camilleri waqqa’ fil-kaxxa lil Markovic u mill-penalty Nikolay Filipov għamel l-iskor finali għal 5-2.
B’din ir-rebħa s-Slimiżi aċċertaw posthom fis-sitt post flimkien ma’ Mrieħel ESS. Għaldaqstant Msida SJ tilfu ċ-ċans li jiġu waħedhom fil-ħames post u jaqbżu lil Mrieħel ESS u t-tim tal-Università.
Fl-aħħar jiem waslet l-ewwel rebħa tal-istaġun għal Zurrieq Wolves li għelbu lil Marsascala Construct Furniture bl-iskor ta’ 3-0. Fl-ewwel taqsima l-Wolves marru fil-vantaġġ b’gowls ta’ Andrew Attard u Steve Sadowski. Fit-tieni taqsima l-Iskalin ippruvaw iwettqu reazzjoni iżda sabu lill-gowlkiper ta’ Żurrieq Wolves Jason Scicluna ferm attent. Sadanittant kien Alistair Camilleri li ssiġġilla din l-ewwel rebħa, meta mill-qrib sab ix-xibka għat-tielet darba għal Żurrieq Wolves.
F’aktar riżultati Valletta u Ħamrun Tre Angeli komplew iżidu fir-rebħ u jżommu posthom fin-naħat ta’ fuq tal-klassifika. Valletta kellhom rebħa faċli ta’ 18-1 kontra t-tim ta’ taħt il-21 sena ta’ Swieqi. Min-naħa l-oħra Ħamrun Tre Angeli għelbu lil Safi San Lorenzo bl-iskor ta’ 5-2.
Mrieħel ESS komplew bil-mixja pożittiva tagħhom hekk kif għelbu lit-tim tal-Università bl-iskor ta’ 4-0. Il-logħba bejn Qormi u Qrendi ġiet posposta minħabba qtugħ fil-provista tal-elettriku fil-Padiljun Sportiv ta’ Kordin. Finalment, Swieqi United kisbu huma wkoll rebħa oħra importanti, meta għelbu lil Tarxien JMI bl-iskor ta’ 14-0.
Riżultati
Safi SL v Ħamrun Tre Angeli 2-5
Valletta v Swieqi U21 18-1
UOM v Mrieħel ESS 0-4
Marsascala v Żurrieq Wolves 0-3
Tarxien JMI v Swieqi 0-14
Msida v Sliema 2-5
