Ħadd ma jaf min hu l-amministratur finanzjarju tal-Partit Laburista u għalhekk min hu responsabbli mill-andament finanzjarju tal-Partit. Dan wassal ukoll biex il-Partit Laburista ma kkonfermax ruħu mal-Liġi tal-Finanzjament tal-Partiti u lanqas sab il-ħin biex jemenda l-istatut tiegħu biex isir konformi ma din il-liġi.
Matthew Mangion, id-Direttur tal-Uffiċċju ELCOM tal-Partit Nazzjonalista qal dan il- waqt il-programm, Mhux għax Jimpurtanti, immexxi minn Norman Vella li xxandar it-Tlieta filgħaxija fuq Net Television.
Matthew Mangion qal li kellha ssir elezzjoni ġenerali llum, il-kandidati li jressaq il-Partit Laburista ma jistgħux jikkontestaw f’isem il-Partit Laburista għax dan mhux reġistrat bħala partit politiku skont il-Liġi dwar ir-Reġistrazzjoni tal-Partiti Politiċi.
Matthew Mangion fakkar ukoll li l-Partit Laburista mhux konformi mal liġi tal-Finanzjament tal-Partiti.
Hu fakkar li fi Frar u f’April tal-2016, il-Partit Laburista laqqa’ konferenza ġenerali u biddel l-istatut biex l-ewwel ħatar lill-Ministru Konrad Mizzi bħala Deputat Mexxej tal-Partit u wara biex jaħtar Deputat Mexxej wara li Konrad Mizzi kien sfurżat iħalli l-kariga wara li faqqa’ l-iskandlu tal-kontijiet sigrieti fil-Panama. Dakinhar ma tressqux emendi biex il-Partit Laburista jkun konformi mal-Liġi dwar il-Finanzjament tal-Partiti. Matthew Mangion qal li dan kollu jitfa’ ħafna mistoqsijiet dwar is-serjetà tal-Partit Laburista.
Il-liġi dwar il-Finanzjament tal-Partiti tgħid li jrid ikun hemm trattament ugwali tal-partiti mill-istat imma dan mhux jiġi.
Fakkar ukoll li l-Partit Laburista għandu numru ta’ proprjetajiet mikrija lilu għall-użu tiegħu mingħand il-Gvern u fl-ewwel ġranet li ħa l-poter, ċeda kawża li saret mill-gvern preċidenti fuq is-sit tal-Australia Hall li ingħatat lill-Partit Laburista.
Għalhekk il-Partit Laburista qed igawdi minn dawk il-proprjetajiet kollha tal-Istat filwaqt li l-partiti politiċi l-oħra m’huma jgawdu xejn minn dan. Hu qal li għalhekk il-Partit Laburista għandu ħafna x’jispjega dwar it-trattament ugwali tal-partiti mill-istat skont il-liġi dwar il-Finanzjament tal-Partiti.
