In-nuqqas ta’ viżjoni tal-Gvern għal niċeċ ekonomiċi ġodda f’pajjiżna, l-infieq tal-gvern u kwistjonijiet politiċi riċenti kienu diskussi waqt il-programm Mhux Għax Jimpurtani li matulu kien mistieden il-Viċi Kap tal-Partit Nazzjonalista għall-Ħidma Parlamentari Mario De Marco.
Dwar il-każ tad-db Group meta mistoqsi mill-preżentatur Norman Vella, jekk qattx innegozja ma uffiċjali tal-gvern dwar il-prezz stabbilit għall-art tal-ITS li issa għaddiet għand il-privat. Mario De Marco wieġeb li le. Spjega li r-rwol tad-ditta legali tiegħu ma kienx li tinnegozja l-prezz.
Il-Viċi Kap Nazzjonalista spjega li d-ditta legali tiegħu kienet ilha tirrapreżenta lill-grupp db għal dawn l-aħħar 4 snin u mhux għaliex tfaċċa dan il-proġett.
Qal wkoll li l-pożizzjoni tal-Partit Nazzjonalista qatt ma kienet kontra l-proġett u għallura t-tmexxija qatt ma sabet problemi li d-ditta legali tiegħu tirrapreżenta lill-grupp.
Iżda meta nħareġ il-prezz li bih ingħatat l-art tal-ITS lil db group, €15-il miljun, il-Partit Nazzjonalista qal li l-prezz ma jirriflettix il-valur u l-potenzjal tal-art. Mario De Marco qal li kien għalhekk li wara li tkellem mal-Kap tal-Partit Simon Busuttil, id-ditta legali tiegħu rrinunzjat milli tirrapreżenta lid-db group.
Dwar dak li l-Ministru Konrad Mizzi li kellu laqgħat f’Kastilja. Mario De Marco qal li Konrad Mizzi hu l-iktar persuna li m’għandux kredibilita’ f’dak li jgħid. Qal wkoll li l-uniċi laqgħat li kellu kienu biex jirrevedu l-abbozz tal-kuntratt u qatt ma nnegozja ma uffiċjali tal-gvern.
Mario De Marco sostna li hu jirrispetta l-pożizzjoni tal-Partit u l-opinjoni pubblika u għalhekk id-ditta legali tiegħu rrinunzjat li tirrapreżenta d-db.
Temi l-oħra diskussi kienu l-ekonomija, li l-gvern mhux joħolqilha niċeċ ġodda u l-infieq esagerat tal-gvern. Dwar elezzjoni ġenerali li qeda ftit xhur il bogħod, il-Viċi Kap Mario De Marco sostna li fi ftit xhur oħra pajjiżna jista’ jkollu gvern nazzjonalista u qal li jemmen li dan jista’ jsir għaliex għandu fiduċja fin-nies li jgħarfu jagħżlu bejn it-tajjeb u l-ħażin.
