Illejla grupp ta’ żgħażagħ daħlu b’maskri ta’ ħnieżer waqt attivita’ tal-Gvern li fiha kien qed jieħu sehem il-Ministru Konrad Mizzi. It-tema ta’ din il-protesta miż-żgħażagħ kien, “Titħanżru minn fuq dahar il-poplu”.
Din l-azzjoni saret biex iż-żgħażagħ juru l-kundanna tagħhom għat-trasferiment ta’ art pubblika għal interessi privati, b’mod partikulari, il-ftehim li ntlaħaq mad-DB Group, għall-art tal-ITS.
Hekk kif iż-żgħażagħ daħlu waqt l-attivita’, uffiċjali tal-Gvern dehru jqumu u jmorru viċin iż-żgħażagħ biex iċaqalċuhom minn wara l-Ministri.
Xi punti li qajmu ż-żgħażugħ kien hemm:
· Art pubblika li bħalissa qed tintuża għal skopijiet edukattivi, b’valur stimat ta’ €212-il miljun, ingħatat lid-DB Group għall-prezz ridikolu ta’ €15-il miljun, biex tintuża għal żvilupp privat. Immaġinaw il-profitti enormi li se jkun qed jagħmel id-DB Group minn fuq art li kienet propjeta’ taċ-ċittadini Maltin kollha.
· Il-Gvern se jonfoq tal-inqas €75 miljun biex jirriloka l-ITS ġewwa SmartCity. Għalhekk, mhux biss art pubblika ingħatat lill-privat biċ-ċiċri, imma l-Maltin se jispiċċaw ukoll iħallsu sabiex Silvio Debono jkun jista’ jimpala l-miljuni.
· Il-€15-il miljun se jitħallsu fuq perjodu ta’ tmien snin b’żero interessi. Jidher li “loans” mingħajr interessi jeżistu biss għas-sinjuruni. Il-biċċa l-kbira tal-Maltin ikollhom iħallsu, għal biċċa l-kbira ta’ ħajjithom, loans bl-interessi biex sempliċiment ikollhom saqaf fuq rashom.
· Mijiet ta’ appartamenti lussużi se jinbnew u jinbiegħu mid-DB Group fuq art li kienet pubblika, filwaqt li eluf ta’ Maltin qed isibuha diffiċli jħallsu l-kera jew il-loan mal-bank.
· Din l-art qed tingħata lil kumpanja li qed tiftaħar li kisret il-liġi dwar il-finanzjament tal-partiti politiċi. Allura, dan id-deal huwa r-riżultat tal-prattiċi estermament suspettużi ta’ din il-kumpanija?
Il-Moviment Graffiti, li organizza l-protesta, qal li r-rizorsa l-iktar skarsa u prezzjuża li għandna, l-art, qed tintilef biex ftit nies ikunu jistgħu jħaxxnu bwiethom. Art pubblika għandha tintuża għall-ġid komuni u mhux biex l-interessi l-kbar jagħmlu l-profitti tagħhom.
Filmat: Maltatoday/ facebook
