Il-Kummissjoni Elettorali ħabbret li qed taħtar Bord Investigattiv sabiex jinvestiga l-każijiet kollha li għandha quddiemha dwar allegati ksur tal-liġi tal-Finanzjament ta’ Partiti Politiċi.
Quddiema, l-Kummissjoni Elettorali għandha erba’ każi ta’ ksur tal-liġi tal-finanzjament tal-partiti mill-Partit Laburista:
dak ta’ ksur tal-liġi meta Muscat organizza attivita’ tal-Partit Laburista fil-Palazz Girgenti, li hu post pubbliku;
dak ta’ ksur tal-liġi meta l-PL ma rreġistrax bħala partit politiku;
dak ta’ ksur tal-liġi meta l-PL ma ppreżentax il-lista tad-donazzjonijiet li rċieva s-sena li għaddiet;
u ksur ta’ liġi ieħor wara li ġie żvelat li l-ogħla uffiċjali tal-Partit Laburista u bosta preżentaturi tal-media tal-One qed jitħallsu b’kuntratti għoljin mal-Gvern.
Il-Kummissjoni għandha quddiema wkoll allegazzjonijiet li qed isiru mill-Partit Laburista dwar donazzjonijiet li rċieva l-Partit Nazzjonalista minn db Group u li ġew ippubblikati. Dawn l-allegazzjonijiet ġew miċħuda, tant li l-Partit Nazzjonalista mill-ewwel qal li m’għandu ebda problema li ssir investigazzjoni.
Il-Kummissjoni qalet li l-kompożizzjoni tal-Bord tkun mħabbra meta l-persuni jiġu appuntanti fil-ġranet li ġejjin.
Muscat għandu ħafna xi jwieġeb għall-ksur tal-liġi tal-finanzjament tal-partiti – PN
Fi stqarrija b’reazzjoni għal din l-aħbar, il-Partit Nazzjonalista qal li l-aħbar l-Kummissjoni Elettorali se tinvestiga l-każijiet kollha ta’ ksur tal-finanzjament tal-partiti li għandha quddiemha, tpoġġi pressjoni kbira fuq Muscat, li issa jrid jispjega kif u għaliex qed jagħżel li jibqa’ jikser il-liġi li daħħal hu stess.
Il-Partit Nazzjonalista sostna, Muscat irid iwieġeb għaliex ma rreġistrax lill-Partit Laburista mal-Kummissjoni Elettorali. Muscat irid iwieġeb għaliex ma ppreżentax il-lista ta’ donazzjonijiet li rċieva l-Partit Laburista. Muscat irid iwieġeb kif u għaliex qed iħallas b’eluf kbar ta’ ewro mit-taxxi tal-poplu Malti u Għawdxi lill-ogħla uffiċjali tal-Partit u lill-preżentaturi tal-media Laburista.
Dwar allegazzjonijiet li saru dwar donazzjonijiet li d-db Group ta lill-Partit Nazzjonalista, l-Partit Nazzjonalista sostna li kien hu stess li żvela d-donazzjonijiet li rċieva u r-relazzjoni kummerċjali ta’ sponsorship ta’ programmazzjoni li l-kumpanija Media.link Communications kellha mal-istess grupp.
Kif diġà qal, sostna l-Partit Nazzjonalista, m’għandu ebda problema li ssir investigazzjoni għax jaf li fl-ebda ħin u ċirkustanza, ma kiser il-liġi tal-finanzjament tal-partiti.
