Filwaqt li ammetta li hu l-Ministru responsabbli mill-Awtorità tal-Ippjanar, Muscat qal li ma kienx hu li ddeċieda li jneħħi l-billboards tal-Partit Nazzjonalista mit-toroq. Dan ħareġ mix-xhieda tal-istess Muscat fil-Qorti waqt li kienet qed tinstema l-Każ Kostituzzjonali li ressaq il-Partit Nazzjonalista wara li s-sena li għaddiet – fl-eqqel tal-iskandlu tal-Panama – l-Gvern ħabbar, ħabta u sabta, li kien se jneħħi l-billboards mit-toroq. Dan wara li l-Partit Nazzjonalista ħareġ il-billboards bil-frażi Shame on You, u ritratti ta’ Muscat, Schembri u Mizzi.
Fil-Qorti, Muscat qal li ma kienx hu li ta l-istruzzjonijiet li wasslu biex jitneħħew il-billboards tal-Partit Nazzjonalista, għax qal hu ma kienx involut meta kien qed jiġi abbozzat l-avviż legali. U żied jgħid li l-uniku ħaġa li għamel fl-Avviż Legali hu li ffirmaha.
Dak iż-żmien, l-Avviż Legali tal-Gvern kien f’nofs kontroversja hekk kif minbarra li sab lill-Partit Nazzjonalista kontrieh, bosta rappreżentanti ta’ sidien tal-ħwienet – fuq quddiem nett il-GRTU – kienu opponew il-fatt li l-ħwienet ma jistgħux jirreklamaw f’billboards, jew li nkella l-ispiża għalihom kienet se tisplodi.
Fil-fatt, fix-xhieda tiegħu, l-President tal-GRTU Paul Abela spjega kif dan l-avviż legali daħal fis-seħħ minħabba pika politika. Fil-fatt, minbarra l-GRTU, anke l-għaqdiet sportivi kienu opponew dan l-abbiż legali għaliex kien se jpoġġihom f’diffikultajiet kbar fl-użu ta’ banners fil-grawnds tal-futbol u klabbs tal-boċċi.
Fid-difiża tiegħu, Muscat qal li xogħlu hu ta’ Prim Ministru u mhux li joqgħod jara l-affarijiet ta’ kuljum. Hu qal li hu jħalli f’idejn ħaddieħor biex jagħmel xogħlu, u hu jara biss l-istampa l-kbira.
Mistoqsi jekk dan l-Avviż Legali ġiex diskuss fil-Kabinett, Muscat ma weġibx.
Il-mistoqsijiet lill-Prim Ministru saru mill-avukati f’isem il-Partit Nazzjonalista Karol Aquilina u Jason Azzopardi, filwaqt li għall-Gvern deher l-Avukat Ġenerali. Għall-Awtorità tal-Ippjanar dehru l-Avukati Robert Abela u Oliver Magri.
