Il-pubbliku qed joħroġ minn butu eluf kbar ta’ ewro għal propoganda mill-Ministru Konrad Mizzi fuq il-media soċjali. Żvelat dan il-gazzetta Times of Malta.
Jirriżulta li bejn Settembru u Jannar li għadda, intefqu aktar minn €5,500 minn Konrad Mizzi biex jippromwovi lilu nnifsu fuq il-paġni tiegħu tal-media soċjali. U dan filwaqt li kontinwament għamel dak kollu li seta’ biex jaħrab milli jiġi ffaċċjat mill-media.
Il-€5,500 f’propoganda fuq l-internet f’erba’ xhur, jiġifieri bejn Settembru u Jannar, ma tinkludix kampanja ta’ propoganda minn Konrad Mizzi biex jikkonvinċi lin-nies li m’għamel xejn ħażin meta fetaħ kumpanija sigrieta fil-Panama u trust moħbi fi New Zealand. Din il-kampanja ta’ propoganda bdiet fi Frar li għaddha u għadha għaddeja.
Minkejja l-propoganda fuq l-internet, il-Ministru Konrad Mizzi kontinwament jaħrab mistoqsijiet dwar l-iskandlu tal-kumpanija sigrieta fil-Panama, fosthom minn fejn kien qed jippjana li jġib miljun ewro fis-sena mill-commissions għall-kontijiet bankarji li ried jiftaħ.
Fl-artiklu ta’ The Times jintqal li l-Ministeru ta’ Konrad Mizzi għall-ewwel irrifjuta li jagħti l-informazzjoni mitluba dwar il-propoganda ta’ Konrad Mizzi fuq l-internet, u kien biss wara talba li saret skont il-Freedom of Information Act li l-Ministeru kien obbligat li jippubblika l-informazzjoni.
