Il-Kabinett ta’ Muscat bħalissa għaddej minn żmien xejn feliċi hekk kif fil-beraħ teżisti gwerra bejn il-Ministru fl-Uffiċċju tal-Prim Ministru Konrad Mizzi u l-Ministru tas-Saħħa Chris Fearne. In-Nazzjon jinsab f’pożizzjoni li jiżvela li din il-gwerra wasslet biex il-Ministru Chris Fearne jibbojkottja ċ-ċerimonja fl-Isptar ta’ Għawdex ta’ nhar il-Ġimgħa waranofsinhar. Fil-fatt, għal din l-attività, anke skont il-Press Call tad-Dipartiment tal-Informazzjoni li ħarġet ftit minuti biss qabel l-attività, kellhom jattendu tliet Ministri: Konrad Mizzi, Chris Fearne u Anton Refalo.
Iżda, in-Nazzjon jista’ jiżvela li minn x’ħin ħarġet il-Press Call, kompliet issir aktar qalila l-gwerra fil-Kabinett ta’ Muscat, bi Chris Fearne jinsisti li jekk Konrad Mizzi se jattendi għal din l-attività, hu mhux se jattendi. In-nies ta’ Chris Fearne għamlu kull attentat mal-Prim Ministru biex jintervjeni hu, u jordna lil Konrad Mizzi biex jibqa’ Malta, iżda Muscat bagħat messaġġ li ma jridx jidħol f’din il-kwistjoni, bis-sorsi tagħna jgħidulna li l-favorit ta’ Muscat hu Konrad Mizzi, u li Muscat jinsab f’pożizzjoni li ma jista’ qatt jordna lil Konrad Mizzi x’jagħmel u x’ma jagħmilx.
Kien għalhekk li Chris Fearne ddeċieda li ma jmurx għal din l-attività, tant li kellha tinbidel ir-running order tal-attività, u d-diskors ta’ Fearne ma sarx. Kollox jindika li Konrad Mizzi għandu kontroll ta’ kollox fuq dan il-proġett, u għalhekk Fearne ma jridx jidher aktar ma’ Mizzi. Fil-fatt, id-diskorsi kollha taċ-ċerimonja m’għamlu ebda referenza għal Fearne, nkluż mill-Kap Eżekuttiv tal-Isptar ta’ Għawdex Nadine Delicata, li faħħret lil Mizzi u lil Refalo, u ma rreferiet bl-ebda mod għal Fearne.
Din il-gwerra ġejja mill-fatt li, minkejja li fil-pajjiż hawn qbil unanimu li post Konrad Mizzi mhux suppost għadu fil-Parlament, wara li nqabad li fetaħ kumpanija sigrieta fil-Panama biex fiha jpoġġi l-commissions li jlaħħqu mal-miljun ewro fis-sena, fir-raba’ distrett – fejn jikkontestaw Konrad Mizzi u Chris Fearne – Mizzi jibqa’ l-aktar b’saħħtu.
Ilbieraħ, The Sunday Times of Malta żvelat li b’daqqa ta’ pinna, Konrad Mizzi daħħal 150 persuna mal-Korporazzjoni għas-Servizzi tal-Ilma – il-maġġoranza assoluta tagħhom mir-raba’ distrett. Dan l-aġir – li jfakkar lil bosta għal dak li prova jagħmel l-eks Prim Ministru Laburista Karmenu Mifsud Bonnici qabel l-elezzjoni tal-1987 – qed jurta mhux ftit kemm lil Chris Fearne, kif ukoll lill-kandidati kollha fir-raba’ distrett, primarjament lid-Deputat Laburista Silvio Parnis. Minkejja l-lealtà tiegħu lejn il-Partit Laburista, Silvio Parnis baqa’ mingħajr Ministeru f’din il-leġiżlatura, u b’hekk, kemm Chris Fearne, iżda aktar u aktar Konrad Mizzi – li għandu l-poter ta’ Ministeru f’Kastilja – għandhom dik li tissejjaħ the power of incumbency, u li qed tissarraf f’impjiegi għall-votanti Laburisti.
Titkellem ma’ min titkellem fil-lokalitajiet ta’ Raħal Ġdid, Ħal Tarxien, Santa Luċija u l-Fgura, din il-gwerra bejn Konrad Mizzi u Chris Fearne hi magħrufa ma’ kulħadd, bin-nies taż-żewġ Ministri jitkellmu apertament kontra xulxin. Persuna viċin Chris Fearne u li tkellmet ma’ in-Nazzjon esprimiet ir-rabja tagħha għall-fatt li Muscat qed ikun dgħajjef ma’ Konrad Mizzi, u flok ikeċċieh mill-Partit Laburista, kompla tah il-poter. Persuna oħra qaltilna li mill-ġimgħa d-dieħla, l-Pjazza ta’ Raħal Ġdid se titbattal għax kulħadd iddaħħal jaħdem mal-Korporazzjoni għas-Servizzi tal-Ilma.
Fl-aħħar elezzjoni ġenerali, fir-raba’ distrett ikkontesta Joseph Muscat, iżda issa kollox jindika li fl-elezzjoni li jmiss, Muscat se jħalli dan id-distrett f’idejn Konrad Mizzi biex ikun hu l-aktar li jġib voti.
