F'konferenza tal-aħbarijiet fl-Universita', il-kelliema għall-Pulse stqarru li mhux se jikkontestaw l-elezzjoni.
L-għaqda studenteska Pulse ħabbret li mhux se tikkontesta l-elezzjonijiet tal-Universita’. B’hekk, aktarx li se tkun l-għaqda studenteska SDM biss li se tikkontesta l-elezzjoni tal-Kunsill Studenti Universitarji.
Issa l-għaqda Pulse se tkun ilha ma tikkontesta dawn l-elezzjonijiet għat-tieni sena in fila. Fl-aħħar elezzjoni li għaliha kkontestat l-għaqda Pulse bi ħdax-il kandidat kontra l-għaqda SDM kien fl-2015, meta l-kandidati tal-SDM ġabu madwar elf vot kull wieħed aktar mill-kandidati tal-Pulse. Dan hu distakk kbir meta kkumparat mat-total ta’ voti ta’ 3,855 student.
Ta’ min jinnota wkoll li ftit tal-ġranet ilu l-għaqda studenteska Pulse kienet qegħda tiċċelebra l-għoxrin anniversarju minn meta ġiet imwaqqfa.
