Li Keqiang, il-Prim Ministru Ċiniż, wissa li ċ-Ċina ma tridx tara gwerra bierda ġdida u enfasizza li minn dejjem għal pajjiżu l-paċi kienet l-aktar ħaġa prezzjuża.
Hu qal dan waqt żjara fl-Awstralja u fl-isfond tat-tensjoni dejjem tiżdied fil-Baħar tan-Nofsinhar taċ-Ċina minħabba l-kontroll ta’ diversi gżjjer.
Waqt li kien qed jindirizza l-Parlament f’Canberra, qal li ċ-Ċina ma xtaqitx tara pajjiżi jappoġġjaw naħa jew oħra bħalma kien jiġri fil-Gwerra l-Bierda.
Hu qal li ċ-Ċina kienet tirrispetta l-politika barranija Awstraljana u sakemm dawn kienu konsistenti maċ-Charter tan-Nazzjonijiet Uniti u l-liġijiet internazzjonali, iċ-Ċina kienet se tikkoopera biex tkompli f’din it-triq. It-twissija ta’ Li qed tkun interpretata wkoll bħala twissija lil Julie Bishop, il-Ministru tal-Affarijiet Barranin Awstraljana, li reċentament sostniet li l-Istati Uniti għadha l-potenza strateġika ewlenija fl-Asja u l-potenza indispensabbli fir-reġjun tal-Oċean Paċifiku.
Hi wkoll sostniet li n-nuqqas ta’demokrazija fiċ-Ċina kienet qed tkun ta’ xkiel bex il-pajjiż jilħaq il-potenzjal ekonomiku kollu tiegħu.
Il-pożizzjoni dejjem aktar assertiva fir-reġjun Asjatiku taċ-Ċina kulma jmur dejjem qed iqanqal aktar tensjoni. Iżda Li qal li ċ-Ċina kienet determinata li l-qawmien tagħha tkun paċifika u ma kenitx qed tipprova turi dominanza fir-reġjun.
