Anzjan ta’ 70 sena kien ikkundannat għal sena ħabs wara li nstab ħati li kkaġuna ġrieħi gravi b’daqqiet ta’ sikkina waqt ġlieda.
Il-ġlieda kienet seħħet f’Paceville fi Frar tal-2006 meta l-akkużat Grezzju Gauci kellu 59 sena.
Oriġinarjament, Gauci kien akkużat ukoll b’attentat ta’ qtil iżda min-natura tal-ġrieħi li sofriet il-vittma Gilbert Spiteri, l-akkuża prinċipali fil-konfront ta’ Gauci kienet ta’ ferita gravi bi strument jaqta’ u bil-ponta kienet irtirata.
Il-vittma kien mas-sieħba tiegħu u xi ħbieb f’Paceville, fosthom ċertu Edmond Zerafa li telaq mill-grupp kmieni biex imur lura d-dar minħabba li kien xurban. Hu u sejjer lejn iz-zona fejn kienet ipparkjata l-vettura tiegħu Zerafa kien involut f’argument ma’ numru ta’ persuni fosthom xufiera tal-karozzi.
Ftit wara wasal Gilbert Spiteri li malli ra lil sieħbu qed jiġi aggredit, għajjat biex dawn jieqfu. Kien hawnhekk li l-akkużat Grezzju Gauci qallu biex ma jindaħalx u t-tnejn ġew fl-idejn. F’ħin minnhom Spiteri imbotta lil Gauci b’dan tal-aħħar jispiċċa fl-art. Kien propju meta Spiteri mar għal Edmond Zerafa biex iqajjmu mill-art li l-akkużat tah daqqiet bis-sikkina.
Malli ġara hekk, kemm Gauci, kif ukoll il-persuni l-oħra involuti fil-ġlieda oriġinali ħarbu minn fuq il-post.
Il-Qorti, preseduta mill-Maġistrat Ian Farrugia, irrimarkat li meta seħħ l-inċident, l-imputat kellu 59 sena u messu jkun jaf aħjar, mhux biss li għandu joqgħod ‘il bogħod mill-vjolenza iżda li ma jużax armi bil-ponta fuq vittma li dak iż-żmien kien għad kellu 22 sena.
Il-Prosekuzzjoni tmexxiet mill-Ispettur Chris Pullicino
