L-eks-President tal-Korea t’Isfel, Park Geun-hye, spiċċat magħluqa f’ċentru tad-detenzjoni fil-belt ta’ Uiwang, ftit sigħat wara li qorti għolja f’Seoul kienet approvatilha l-arrest.
Park, qabel, kienet għaddiet minn disa’ sigħat ta’ interrogazzjoni, bil-qorti distrettwali ċentrali ta’ Seoul tapprova t-talba tal-prosekuturi biex hi tinżamm taħt arrest minħabba l-biża’ li hi setgħet teqred xi provi dwar il-korruzzjoni.
Ir-rapporti qalu li Park qed tiffaċċja 20 jum priġunerija waqt li l-pulizija tinvestiga allegazzjonijiet dwar aġir korrott min-naħa tal-eks- President.
F’din is-sitwazzjoni, il-prosekuturi Koreani jistgħu jżommu lil Park Geun-hye taħt arrest għal 20 jum qabel jippreżentawlha akkużi formali. L-akkużi potenzjali, intant, jistgħu jkunu dwar ‘rikatt’, ‘abbuż ta’ poter’ u ‘ċirkulazzjoni ta’ sigrieti tal-Istat’.
Il-prosekuturi kienu sottomettew mal-120,000 paġna ta’ dokumenti li jirrelataw għall-każ waqt li sostnew li ‘huma kienu se jmorru kontra l-prinċipji tal-ġustizzja’ li kieku ma żammewx lill-eks- President taħt arrest. Huma spjegaw ukoll li Park qed tiċħad għall-parti kbira tal-akkużi ‘u li kien hemm is-sogru li hi tagħmel minn kollox biex teqred xi provi li jistgħu jintużaw kontra tagħha’.
Park Geun-hye kienet l-ewwel mara li laħqet President tal-Korea t’Isfel. Intant, hi, f’Diċembru, għaddiet minn proċess ta’ impeachment mill-Assemblea Nazzjonali fost akkużi li hi ‘ikkollaborat’ ma’ ħabiba tagħha f’sitwazzjoni fejn il-kumpaniji kbar fil-Korea t’Isfel kienu kostretti joħorġu l-flus taħt sistema ta’ rikatt.
Akkuża oħra kontra Park hi li hi ippermettiet lill-ħabiba tagħha, Choi Soon Sil, biex tindaħal fl-affarijiet tal-Istat.
