Fl-aħħar jiem, erba’ plejers Maltin ikkompetew fil-Grand Prix tal-Iskozja li saret fi Glasgow. Massimo Cremona u Angelo Borg ikkompetew fil-Kategorija Open filwaqt li Jason Pisani u Joe Mifsud ikkompetew fil-Kategorija tal-veterani. Dan il-kampjonat internazzjonali kien organizzat taħt il-Federazzjoni ta’ Sports Internazzjonali Tabella Futbol. (FISTF).
Fil-kategorija tal-veterani, Joe Mifsud u Jason Pisani rnexxielhom jirbħu l-gruppi rispettivi tagħhom u waslu sas-semifinali fejn lagħbu kontra xulxin bil-logħba tintemm 1-1. Fil-ħin barrani, Joe Mifsud skorja l-gowl rebbieħ biex fil-finali lagħab kontra l-Belġjan Daniel Scheen. F’logħba missielta, Joe Mifsud irnexxielu jirbaħ 2-1 wara li skorja l-gowl rebbieħ ħames minuti mit-tmiem.
Angelo Borg u Massimo Cremona rebħu l-gruppi wkoll fil-kategorija Open. Huma komplew javvanzaw fejn it-tnejn irnexxielhom jaslu sal-finali, bil-partita tispiċċa wkoll 1-1. Ir-riżultat baqa’ l-istess fil-ħin barrani, bil-partita tkun deċiża bix-shots. Cremona rnexxielu jiskorja wieħed, li kien biżżejjed għalih biex jirbaħ 2-1.
