Is-Sibt filgħodu fil-kappella tas-Salesjani ta’ St Patrick’s f’Tas-Sliema saret ċelebrazzjoni tal-Għid mill-komunità Pollakka f’Malta li tlaħħaq aktar minn 700. Fost dawk li attendew kien hemm tfal libsin ilbies tradizzjonali Pollakk.
Matul din iċ-ċelebrazzjoni li għaliha attenda wkoll il-Kap tal-Partit Nazzjonalista Simon Busuttil akkumpanjat minn Cristina, sar it-tberik ta’ ikel li ġabu magħhom il-familji Pollakki, li hi tradizzjoni tal-Polonja li ssir f’Sibt il-Għid.
F’kumment lil NET News, Marta Cutajar li hi Pollakka miżżewġa Malti u tgħix f’Malta qalet li dan l-ikel imbagħad jinsaqam fost dawk l-iktar fil-bżonn fil-komunità f’Ħadd il-Għid waqt il-kolazzjon.
Iċ-ċelebrazzjoni tmexxiet minn saċerdot Salesjan żagħżugħ Pollakk u fost l-ikel li tbierek kien hemm bajd, ħobż u melħ li għandhom għeruq fondi f’din it-tradizzjoni Pollakka.
Marta Cutajar qalet li l-komunitá Pollakka hi grata lejn is-Salesjani ta’ Tas-Sliema li permezz taċ-Chaplain tal-kappella Fr Joe Cini jistgħu jiltaqgħu u jiċċelebraw il-quddiesa fil-kappella. Hi qalet li kull xahar saċerdot Pollakk jiġi Malta u jagħti servizz lill-komunità pollakka f’Malta.
Fr Joe Cini qal li billi f’St Patrick’s il-liturġija ssir dejjem, bl-Ingliż huma jilqgħu għal-liturġija nies mill-Ewropa u mid-dinja kollha għax imorru minħabba l-lingwa. Hu spjega li kull xahar jattendi saċerdot Salesjan Pollakk biex jieħu ħsieb il-komunità Pollakka f’Malta.
Hu qal li ċ-ċelebrazzjoni li kienet qed issir hi waħda tradizzjonali Pollakka tat-tberik tal-ikel li huma jlestu għall-Għid il-kbir u li jkunu iċċaħħdu minnu matul ir-Randan.
Fr Cini qal li minbarra l-komunitá Pollakka li tattendi għal servizz draba fix-xahar, kull xahar jattendi wkoll saċerdot tar-rit Ortodoss mill-Ġorġja biex jagħti servizz lill-komunità mill-Ġorġja f’pajjiżna. Hu qal li nhar ta’ ġimgħa l-bibien tas-Salesjani jkunu miftuħin għall-komunità Taljana f’Malta u dan juri li huma jilqgħu lill-kulħadd għax il-knisja tas-Salesjani hi waħda internazzjonali.
