It-30 ġurnata tal-kampjonat BOV Premier intemmet ilbieraħ, fejn bi tliet logħbiet għal tmiem il-kampjonat, il-verdetti qed jersqu viċin li jkunu konklużi.
Hibernians komplew jersqu lejn ir-rebħ tat-12-il kampjonat wara li fil-Hibernians Stadium għelbu lil Gżira United 2-0. Il-Pawlisti fetħu l-iskor fil-11-il minuta minn Jorginho, bit-tim ta’ Miller jagħlaq il-logħba sitt minuti mit-tmiem permezz ta’ Gilmar da Silva Ribeiro.
Balzan kisbu rebħa drammatika ta’ 2-1 fuq St. Andrews biex telgħu fit-tieni post ħames punti taħt Hibernians. Balzan marru fil-vantaġġ fit-62 minuta permezz tal-aqwa skorer Bojan Kaljevic, b’St. Andrews iġibu d-draw fit-93 minuta minn penalty ta’ Joseph Farrugia. Iżda Balzan skorjaw il-gowl tar-rebħa b’gowl mill-viċin ta’ Elkin Serrano Valero.
Valletta u Birkirkara spiċċaw fi draw ta’ 3-3 f’partita pjaċevoli. Il-Beltin fetħu l-iskor wara tmien minuti permezz ta’ Santiago Malano, iżda żewġ gowls ħames minuti qabel tmiem l-ewwel taqsima ta’ Nikola Vukanac u Christian Bubalovic dawru l-iskor favur Birkirkara. Valletta ġabu d-draw fl-74 minuta permezz tas-sostitut Maximiliano Velasco, iżda minuta wara Birkirkara ngħataw penalty li minnu Edward Herrera ma żbaljax. Il-Beltin reġgħu ġabu d-draw fit-80 minuta b’gowl ieħor tas-sostitut Velasco.
Sliema għelbu lil Floriana 3-0 fid-derby l-antik ta’ Malta. Kien Mark Scerri li fetaħ l-iskor fl-44 minuta, bis-Slimiżi jagħlqu l-logħba fit-92 minuta b’gowl ta’ Jean Paul Farrugia, biex minuta wara Frank Temile skorja t-tielet gowl.
Pembroke Athleta u Tarxien Rainbows spiċċaw fi draw ta’ 1-1. Kienu Pembroke li marru fil-vantaġġ fl-64 minuta permezz ta’ penalty ta’ Stevan Racic, iżda Tarxien ġabu d-draw disa’ minuti wara minn penalty ukoll, b’Ayrton Azzopardi jiskorja għar-Rainbows.
Mosta fetħu vantaġġ ta’ seba’ punti fuq Pembroke, b’rebħa tajba ta’ 2-1 fuq Ħamrun Spartans. Kienu l-Ispartans li marru fil-vantaġġ qabel tmiem l-ewwel taqsima permezz ta’ Massimiliano Giusti. Mosta ġabu d-draw fl-54 minuta minn David Fenech, biex Njongo Priso skorja l-gowl tar-rebħa fit-78 minuta.
