Id-dokument tal-Partit Nazzjonalista dwar il-politika ambjentali jista’ jsib appoġġ sħiħ kemm minn imprendituri kif ukoll minn ambjentalisti. Dan qalu l-Kap tal-Partit Nazzjonalista Simon Busuttil waqt laqgħa mal-imsieħba soċjali fi ħdan il-Kunsill Malti għall-Iżvilupp Ekonomiku u Soċjali.
Simon Busuttil qal li l-ambjent u l-ekonomija mhumiex kontra xulxin iżda huma, għall-kuntrarju, kkumplimentari għat-titjib tat-tnejn. Huwa qal li ambjent aħjar isaħħaħ l-ekonomija u ekonomija tajba tfisser ambjent aktar san.
Il-Kap tal-Partit Nazzjonalista qal li l-ambjent huwa parti intrinsika mill-kwalità tal-ħajja u hemm affarijiet li ma tistax tikkwantifikahom fi flus. Huwa semma’ affarijiet bħas-saħħa, l-ħsejjes, l-arja, l-ilma, u affarijiet oħra li l-valur tagħhom mhuwiex biss ekonomiku iżda jagħmlu differenzi kbira fil-mod kif ngħixu.
Id-dokument ‘Kwalità ta’ Ħajja Aħjar’ iħares b’mod wiesa’ lejn l-ambjent u joffri proposti fattibbli dwar diversi oqsma tal-ħajja. Huwa qal li Malta trid mhux biss tilħaq standards Ewropej imma tista’ wkoll taqbżihom, bħal pereżempju fis-settur tal-enerġija alternattiva, fejn il-Partit Nazzjonalista qiegħed jipproponi l-introduzzjoni ta’ Solar Roads.
Simon Busuttil qal li l-Partit Nazzjonalista qiegħed jipproponi politika konkreta u fit-tul sabiex l-ambjent jinħeles darba għal dejjem mill-politiċizzazzjoni. Huwa qal li każi bħal taż-Żonqor u tal-art tal-ITS juru kemm illum l-ambjent sar vittma tal-politika u li l-Gvern m’għandux jiddeċiedi waħdu dwar trasferiment ta’ art pubblika f’ODZ. Simon Busuttil qal li Gvern ġdid Nazzjonalista jara li dan jibda jsir bi qbil ta’ żewġ terzi fil-Parlament.
Il-Kap tal-Partit Nazzjonalista kien akkumpanjat mix-Shadow Minister għall-Ambjent, Enerġija, u Trasport Marthese Portelli; mill-Kelliem għall-Ambjent, Artijijet u Infrastruttura Ryan Callus; il-Kelliem għad-Djalogu Soċjali, Komunikazzjoni, u d-Drittijiet taċ-Ċittadin Clyde Puli; il-Kandidat għall-Elezzjoni Ġenerali Ivan Bartolo; u l-President tal-Konvenzjoni Ġenerali tal-Partit Nazzjonalista IdeaAmbjent Simone Vella Lenicker.
