Minkejja l-allegazzjonijiet serji li qed isiru minn missier Ġermaniż u l-akkużi li bintu ġiet maħtufa minn Malta fil-bidu tax-xahar li għadda, il-Pulizija f’Malta qed tgħid li m’hawn l-ebda rapporti ta’ tfal maħtufa.
Dan joħroġ minn risposti li tawna l-Pulizija għal domandi mibgħuta l-ġimgħa li għaddiet lid-Depot fil-Floriana.
Meta kien mistieden fil-programm NET LIVE ftit tal-ġranet ilu, il-missier ta’ Aurelia – Andreas Wil Gerdes – esprima d-diżappunt tiegħu għall-mod kif qed isiru l-affarijiet minn naħa Maltija. “Hemm xi ħaġa nieqsa minn naħa tal-Pulizija Maltija. Hemm nuqqas ta’ komunikazzjoni”, stqarr missier Aurelia.
Skont il-Korp tal-Pulizija, bħalissa la hemm rapporti ta’ tfal rappurtati nieqsa u lanqas adulti.
Il-ġimgħa li għaddiet, il-media fil-Kroazja qed irrappurtat li ċ-ċkejkna Aurelia tinsab f’Zagreb. Dan wara li allegatament inħatfet minn ommha Anika fil-bidu tax-xahar li għadda.
L-aħbar ħarġet fis-sit elettroniku Index li huwa sit awtorevoli tal-aħbarijiet fil-Kroazja.
L-akkuża tal-missier hi li Anika irnexxilha tħarrab lit-tifla Aurelia minn Malta minkejja li kien hemm impożizzjoni fuq l-ivjaġġar.
