“Issa li hemm ukoll whistleblower li tat, b’kuraġġ kbir, ix-xhieda tagħha quddiem l-inkjesta li qed tinvestiga kriminalment lill-Prim Ministru, żgur li Joseph Muscat għandu jitlaq issa għax postu m’għadux fil-politika”, stqarr dan il-Kap tal-Partit Nazzjonalista Simon Busuttil wara li sar magħruf li xhedet il-whistleblower fl-inkjesta Maġisterjali li qed tinvestiga l-involviment tal-Prim Ministru Joseph Muscat fl-iskandlu tal-Panama Papers.
Simon Busuttil qal li dan l-aħħar żvilupp f’ġimgħa sħiħa ta’ fatti ġodda kuljum ikompli jżid il-kredibilità tal-informazzjoni li l-kumpanija Egrant hija tal-mara tal-Prim Ministru u jkompli jkisser ukoll l-aħħar farka kredibilità li seta’ kien baqagħlu Joseph Muscat.
Il-Kap tal-Partit Nazzjonalista qal li llejla kompliet taqa’ l-maskra ta’ Joseph Muscat li l-uniku ċans li baqagħlu biex isalva ġildu hija li jkompli jigdeb.
Temm jgħid li post Muscat m’għadux fil-politika, u għandu jitlaq issa biex jieqaf jagħmel ħsara lil pajjiżna.
