Illejla l-festa Pawlista ġiet kompluta kontra Tarxien Rainbows f’partita festa fejn Hibernians rebħu 6-1. Huma skurjaw u għalqu l-partita kmieni u setgħu b’hekk jibdew jew aħjar ikomplu, ġustament, iċ-ċelebrazzjonijiet tagħhom għar-rebħ tal-kampjonat.
Kien it-12-il kampjonat fl-istorja tat-tim ta’ Raħal Ġdid, it-tieni kampjonat fi tliet snin. It-tieni kampjonat ukoll ma’ Hibernians għal kowċ Mark Miller li kien ħadu fl-2009 u reġa’ rebħu din is-sena fir-ritorn tiegħu bħala kowċ assistit minn Josef Mansueto. Hibernians bdew ħażin il-kampjonat b’telfa ta’ 3-1 kontra n-neopromossi Ħamrun Spartans. It-tim ta’ Miller ma kellux perjodu wieħed partikolari tajjeb imma għaraf iwettaq reazzjoni wara telfa u partiti ħżiena.
B’hekk kien l-iktar tim konsistenti matul il-kampjonat, b’71 punt, 22 rebħa, 5 draws u sitt telfiet.
Kontra Tarxien il-gowls waslu kmieni u spikka ż-żgħażugħ Jurgen Degabriele bi tliet gowls. Degabriele, li ta’ 20 sena ġa rebaħ it-tieni kampjonat tiegħu din id-darba bħala protagonista bħala l-aqwa skorer ta’ Hibernians.
Fit-tielet minuta, minn korner ta’ Jackson Lima meħlus, il-ballun reġa ġie għand Lima bi kross ieħor lejn il-kaxxa, għola bir-ras Jurgen DEGABRIELE skorja l-ewwel gowl.
Tliet minuti wara, minn kross ta’ Failla minn nofs il-grawnd, Jurgen DEGABRIELE kien kapaċi jikkontrolla u jixxuttja fl-anglu tax-xibka u ħasad lil gowlkiper Cassar għat-tieni darba fi tliet minuti. Fl-għaxar minuta Hibernians komplew bil-festa anki ta’ gowls tagħhom, meta ingħataw penalty wara li Bradley Barbara miss il-ballun b’idu f’nofs il-kaxxa. Mill-ħdax-il metru Jurgen DEGABRIELE ra lil Cassar isalvalu l-penalty imma r-rebound reġa ġie għandu u skorja Hat-trick fi ftit minuti.
Fl-20 minuta tal-Pagun għamluhom erba’. Minn kross ieħor tal-captain Clayton Failla, antiċipa lil kulħadd bir-ras JORGINHO li skorja l-għaxar gowl tiegħu fil-kampjonat. Minn hemm il-partita ġiet formalita’. Hibernians komplew jattakkaw biex jiskurjaw iżjed gowls.
Qabel il-mistrieħ pruvaw ukoll Kristensen bir-ras u Jackson Lima bi freekick. Tnax-il minuta mit-tmiem ċans għal Degabriele għal poker imma minn kross tas-sostitut Gilmar ħareġ Cassar u salvalu. Jackson LIMA fit-82 minuta rnexxilu jiskurja l-ħames gowl Pawlist biex jiċċelebra b’gowl anki hu.
L-uniku reazzjoni ta’ Tarxien waslet meta ħames minuti mit-tmiem skurjaw il-gowl tal-bandiera minn penalty ta’ NILSSON imma dan ma kienx l-aħħar gowl tal-logħba għax tliet minuti wara kien GILMAR ta’ Hibs li ssiġilla l-partita bi ġmiel ta’ gowl.
Tarxien Rainbows li għadhom immexxija mill-captain Triston Caruana issa jibdew jikkonċentraw fuq is-semifinali tal-FA Trophy.
Fi tmiem il-captain Clayton Failla ġie ppreżentat bit-trofew ta’ Champions u l-festa issa tkompli fil-pjazza ta’ Raħal Ġdid.
