STOMPERS……….43
OVERSEAS………..38
Stompers huma ċ-Champions tal-kampjonat CISK wara li għelbu lil Overseas 43-38 f’logħba li l-ebda tim ma kien ħaqqu jitlef hekk kif il-partita kellha titkompla fil-ħin barrani. Il-partita sal-ħin regolamentari ntemmet 24-24 u kellhom ikunu l-20 minuta ta’ wara li ddeċidew il-konfront, biex b’hekk pattew għat-telfa kontra Overseas fil-finali tal-Mediterranean Cup tal-ġimgħa l-oħra.
Overseas fetħu tajjeb u skorjaw żewġ tries fl-ewwel 20 minuta permezz ta’ Anthony Harvey u Devante Hinds, b’Dudman jagħmel conversion waħda biex Overseas kienu jinsabu 12-0 minn fuq. Daqqa ta’ ħarta għal Stompers hekk kif Gum ġie muri l-karta s-safra, b’Anthony Harvey jiskorja t-tieni try personali b’Overseas imorru 17-0 minn fuq.
Il-plejer importanti ta’ Overseas Sarres kellu joħroġ mil-logħba, u dan ta spinta lil Stompers li skorjaw żewġ tries minn Tom Pace-Moore u Luke Debattista u rnexxielhom joqorbu għal tliet punti biss distakk.
Stompers irnexxielhom idawru l-iskor b’żewġ tries fl-ewwel kwarta tat-tieni taqsima permezz ta’ Jeremy Debattista fil-kantuniera, u Isaac Bezzina li skorja minn mal-linja biex marru 24-17. Iżda Overseas żiedu fir-ritmu u wara li Hinds għal Overseas u Calvin Briffa għal Stompers ntwerew il-karta s-safra, kien Anthony Harvey li skorja try minn lineout, biex il-partita marret għal ħin barrani.
Stompers marru minn fuq fl-ewwel minuta tal-ħin barrani bi try u conversion ta’ Nathan Gatt. Iżda Overseas wieġbu mill-ewwel b’Dudman jiskorja try u conversion biex iż-żewġ timijiet reġgħu kienu jinsabu ndaqs 31-31.
Stompers reġgħu marru minn fuq ftit wara bi try minn taħt il-lasta tal-captain Camilleri wara li evita d-daħliet ta’ Dudman u Barry. Julian Caruana kompla jkabbar il-vantaġġ bi try ieħor għal Stompers, iżda ftit wara rċieva karta safra biex tilef dak li kien għamel ftit qabel.
Overseas reġgħu pruvaw jidħlu fil-logħba u reġa’ kien Anthony Harvey li skorja r-raba’ try tiegħu minn lineout, b’Dudman jagħmel il-conversion u jnaqqas id-distakk għal ħames punti, iżda ma kienx għad fadal ħin biex isalvaw il-logħba.
Fil-logħba għat-tielet post, Falcons għelbu lil Kavallieri 63-7. Fi tmiem il-logħba, il-President tal-MRFU Steve Busuttil preżenta t-tazza lill-captain ta’ Stompers.
Referee: Lionel da Silva
