Il-Pulizija fi Franza akkużaw raġel b’reati konnessi mat-terroriżmu wara li, ix-xahar li għadda, instabulu traċċi tad-DNA fuq arma tan-nar li intużat għall-qtil ta’ uffiċjal tas-sigurtà f’Pariġi.
L-akkużat, ta’ 23 sena, ma kienx magħruf qabel mal-pulizija u l-investigaturi. Skont l-awtoritajiet, huwa l-ewwel persuna li tressqulha akkużi relatati mal-isparatura inkwistjoni li kienet seħħet fil-viċinanzi ta’ Champs Elysees.
Il-qattiel tal-pulizija, Karim Cheurfi, kien spiċċa maqtul ukoll ftit wara dik l-azzjoni terroristika – u wara li hu laħaq iferi lil żewġ pulizija oħra, kif ukoll lil turist Ġermaniż. Qrib il-katavru ta’ Cheurfi kienet instabet nota b’messaġġ ta’ tifħir għall-grupp terroristiku ISIS.
Intant, is-suspettat li kien arrestat xi sigħat ilu fir-reġjun ta’ Pariġi qed ikun akkużat b’konnessjoni ma’ kumplott terroristiku u dwar l-użu ta’ arma relatata mat-terrur. Ingħad li d-DNA tal-imputat instabet fuq iċ-ċipp tal-azzarin Kalashnikov li kien intuża fl-attakk partikulari qrib Champs Elysees.
Dan ir-raġel, li qed jinżamm mill-pulizija, intant, insista mal-investigaturi li ma kienx jaf lil Karim Cheurfi.
