775 familja jinsabu ferm imħassba dwar l-iżvilupp propost fin-nofs ta’ pjazza biswit il-kappella ta’ Santa Margerita fil-Mosta – u għalhekk niżlu bi protesta fit-toroq. F’din il-fetħa asfaltata, għadu kif ingħata peremess mill-Awtorita’ tal-Ippjanar biex ikun jista’ jinbena ħajt periferali ta’ seba’ filati – li jkun l-ewwel stadju qabel l-approvazzjoni tal-permess ta’ full development għall-binja ta’ ħames sulari u basement.
NET News attenda għal din il-protesta favur l-ispazju miftuħ li kienet indirizzata mill-Professur George Cassar, u s-Sindku tal-Mosta Ivan Bartolo. Flimkien ma’ dawn il-kelliema kien hemm kandidati u Kunsilliera Lokali f’isem il-Partit Nazzjonalista.
Il-kelliema elenkaw diversi problemi li dan l-iżvilupp iġib miegħu:
- Dan l-ispazzju miftuħ jintuża għall-attivtajiet kollha fiż-żona ta’ Santa Margerita
- Il-pjazza hi pulmun taż-żona u dan il-proġett se jħalli toroq dojoq u aktar bini għoli
- Jinħolqu problemi tat-traffiku minħabba t-toroq se jidjiequ għall-vetturi kbar u karozzi tal-linja, u kif ukoll jelimina l-ispazji ta’ parking bays li hemm.
- Ħames sulari għoli, se toħnoq ż-żona u taffetwa ħażin il-valur tal-propjeta’
- Ir-residenti jħossu li għandu jibqa’ spazju pubbliku kif ilu għal aktar minn 30 sena
- Jiżdied il-periklu tat-tfal fiż-żona
- L-iżviluppatur qed isejjaħ il-proġett bħala ‘Community Centre’, iżda r-residenti jħossu li dan huwa żvilupp kummerċjali
- Il-proġett se jżid l-għargħar tal-ilma tax-xita li diġa’ huwa problema fiż-żona
- Ir-residenti jħossu li m’għandhomx bżonn aktar ħwienet fiż-żona
- Dan mhux se jkun ċentru tal-komunita’ iżda ċentru kummerċjali
- Ir-residenti ma jistgħux jifhmu kif l-Awtorita’ tal-Ippjanartista’ tikkonsidra permess għal proġett fuq art asfaltata li tintuża bħala pjazza mill-komunita’ kollha.
Flimkien ma’ dawn iż-żewġ kelliema, NET News ħa r-reazzjoni ta’ wħud mir-residenti li huma nkwetati dwar dan l-iżvilupp. F’din il-protesta, dawn il-familji appellaw lill-Gvern biex jesproprija din l-art biex tibqa’ spazju miftuħ għall-benefiċċjuta’ kulħadd.
