L-iskwadri tas-salvataġġ fis-Sri Lanka, appoġġjati minn ħelikopters, ħadu sehem fl-evakwazzjonijiet kontinwi ta’ nies miż-żoni vulnerabbli u fost it-tfittxija għal persuni li spiċċaw iżolati f’‘artijiet ta’ ħadd’, b’kaġun ta’ għargħar qawwi u l-gliegel tat-tajn sussegwenti.
Is-sitwazzjoni ta’ emerġenza ilha effettiva għal jiem, bl-għargħar u t-tajn jgħarrqu diversi neighbourhoods fis-Sri Lanka, fost ċirkustanzi li fihom inqatlu almenu 170 persuna.
Hu minnu wkoll li l-awtoritajiet għaddejjin bi ġlieda mal-ħin biex jevakwaw ir-residenti tal-aktar inħawi esposti għal periklu. Dan meta, ‘il quddiem, mistenni aktar inżul tax-xita li, bla dubju, għandha tikkumplika l-isforzi għas-salvataġġ.
S’issa, ‘il fuq minn 100,000 persuna laħqu sabu kenn f’xi 340 kamp tal-għajnuna li twaqqfu lejn in-nofsinar u l-punent tal-pajjiż.
Saru xi ħaġa ta’ kuljum id-dehriet tad-dgħajjes tal-Armata għaddejjin mit-toroq mgħarrqin tal-villaġġi Srilankani. L-uffiċjali lokali qalu wkoll li għadhom rappurtati nieqsa ‘il fuq minn 100 persuna sa mill-ewwel inċidenza ta’ għargħar, nhar il-Ġimgħa. Dan waqt li kaskati sħaħ ta’ tajn aħmar ‘belgħu’ numru kbir ta’ residenzi qalb il-villaġġi.
