Ftit tal-ħin ilu l-Prim Ministru Joseph Muscat ħabbar il-Kabinett ġdid tiegħu wara r-rebħa elettorali ta’ tmiem il-ġimgħa li għadda.
Fil-ħatriet tal-Prim Ministru spikkat il-ħatra mill-ġdid ta’ Keith Schembri bħala Chief of Staff, waqt li Konrad Mizzi nħatar bħala Ministru għat-Turiżmu kif ukoll responsabbli mill-privatizzazzjoni tal-Air Malta. Minn naha l-oħra, spikkat id-deċiżjoni li l-Prim Ministru jħalli barra mill-kabinett lill-eks-Ministru għal Għawdex Anton Refalo, u ħatar minflok lil Justyne Caruana bħala Ministru għal Għawdex.
Il-Prim Ministru se jżomm ukoll lil Joe Mizzi bħala Ministru, din id-darba Ministru għall-Enerġija u l-Ilma.
Chris Cardona baqa’ Ministru għall-Ekonomija u l-Intrapriżi Żgħar, baqa’ wkoll Ministru għall-Edukazzjoni u x-Xogħol Evarist Bartolo, li se jkun assistit minn Clifton Grima bħala Segretarju Parlamentari. Edward Scicluna se jibqa’ wkoll Ministru tal-Finanzi.
Michael Farrugia issa se jkun Ministru għall-Intern u s-Sigurtà Nazzjonali.
Owen Bonnici se jibqa’ Ministru tal-Ġustizzja u l-Kultura. Hu se jkun assistit minn Silvio Parnis bħala Segretarju Parlamentari għall-Kunsill Lokali, u Deo Debattista bħala Segretarju Parlamentari għall-V18.
Josè Herrera se jibqa’ Ministru għall-Ambjent assistit mis-Segretarju Parlamentari Clint Camilleri.
Il-Ministru tas-Saħħa se jibqa’ Chris Fearn, u Carmelo Abela issa hu l-Ministru għall-Affarijiet Barranin u l-Kummerċ.
Ian Borg hu l-Ministru responsabbli mit-Trasport u Proġetti, u responsabbli wkoll mill-Ippjanar u l-Artijiet. Hu se jkun assistit mis-Segretarju Parlamentari Chris Agius.
Il-Prim Ministru ħabbar li hu se jkun responsabbli mis-servizzi finanzjarji u l-ekonomija diġitali, miegħu se jkollu s-Segretarji Parlamentari Silvio Schembri u lis-Segretarju Parlamentari Julia Farrugia, responsabbli mir-riformi u miċ-ċittadinanza.
Helena Dalli nħatret bħala Ministru għall-Affarijiet Ewropej u l-Ugwaljanza. Fl-uffiċċju tagħha se jkun hemm ukoll is-Segretarju Parlamentari Aaron Farrugia responsabbli mill-Fondi Ewropej u d-Djalogu Soċjali.
Byron Camilleri nħatar Whip tal-Grupp Parlamentari Laburista waqt li Robert Abela nħatar bħala konsulent legali tal-Prim Ministru.
Keith Schembri u Konrad Mizzi jibqgħu jmexxu – PN
L-għażla ta’ Konrad Mizzi bħala Ministru u Keith Schembri bħala Chief of Staff hi konferma ta’ kemm Muscat ma tgħallem xejn mill-elezzjoni ġenerali, u għażel li jkompli jmexxi ‘l quddiem politika diviżiva flok waħda ta’ għaqda. Din l-għażla tikkonferma wkoll li Keith Schembri u Konrad Mizzi għadhom jikkontrollaw kollox, inkluż lil Muscat.
Fl-għażla tal-Kabinett, Muscat kellu l-opportunità li jwassal messaġġ ta’ bidu ġdid fl-istil ta’ politika tiegħu, iżda minflok għażel li jwebbes rasu u falla fl-ewwel test tiegħu.
Il-Partit Nazzjonalista jinnota wkoll li minkejja l-kritika fuq in-nefqa esaġerata tal-Kabinett fil-leġiżlatura li għaddiet, Muscat kompla jwebbes rasu u saħansitra, din id-darba żied in-numru ta’ Ministri u Segretarji Parlamentari. Dan ifisser nefqa akbar mit-taxxi tal-poplu Malti u Għawdxi.
Kompożizzjoni tal-Kabinett 2017
Prim Ministru
JOSEPH MUSCAT
Segretarju Parlamentari għas-Servizzi Finanzjarji, Ekonomija Diġitali u Innovazzjoni
SILVIO SCHEMBRI
Segretarju Parlamentari għar-Riformi, Ċittadinanza u Simplifikazzjoni
JULIA FARRUGIA
Ministru għall-Ekonomija, Investiment u Negozji Żgħar
CHRIS CARDONA
Ministru għall-Edukazzjoni u Xogħol
EVARIST BARTOLO
Segretarju Parlamentari għaż-Żgħażagħ, Sport u Għaqdiet Volontarji
CLIFTON GRIMA
Ministru għall-Enerġija u Immaniġġjar tal-Ilma
JOE MIZZI
Ministru għall-Affarijiet Ewropej u Ugwaljanza
HELENA DALLI
Segretarju Parlamentari għall-Fondi Ewropej u Djalogu Soċjali
AARON FARRUGIA
Ministru għall-Finanzi
EDWARD SCICLUNA
Ministru għat-Turiżmu
KONRAD MIZZI
Ministru għall-Intern u Sigurtà Nazzjonali
MICHAEL FARRUGIA
Ministru għall-Ġustizzja, Kultura u Gvern Lokali
OWEN BONNICI
Segretarju Parlamentari għall-Gvern Lokali u Komunitajiet
SILVIO PARNIS
Segretarju Parlamentari għall-Protezzjoni tal-Konsumatur u Valletta18
DEO DEBATTISTA
Ministru għall-Ambjent, Żvilupp Sostenibbli u Tibdil fil-Klima
JOSÉ HERRERA
Segretarju Parlamentari għall-Agrikoltura, Sajd u Drittijiet tal-Annimali
CLINT CAMILLERI
Ministru għas-Saħħa
CHRIS FEARNE
Ministru għall-Affarijiet Barranin u Promozzjoni tal-Kummerċ
CARMELO ABELA
Ministru għat-Trasport, Infrastruttura u Proġetti Kapitali
IAN BORG
Segretarju Parlamentari għall-Ippjanar u Suq tal-Propjetà
CHRIS AGIUS
Ministru għal Għawdex
JUSTYNE CARUANA
Ministru għal Familja, Drittijiet tat-Tfal u Solidarjetà Soċjali
MICHAEL FALZON
Segretarju Parlamentari għall-Akkomodazzjoni Soċjali
RODERICK GALDES
Segretarju Parlamentari għal Persuni b’Diżabilità u Anzjanità Attiva
TONY AGIUS DECELIS
