In-Nazzjonijiet Uniti wissiet li l-Jemen, illum, qed tiffaċċja l-agħar epidemija tal-kolera minn kwalunkwe post fid-dinja.
Stqarrija mill-UNICEF u l-Organizzazzjoni Dinjija tas-Saħħa (WHO) qalet li l-ammont ta’ każi tal-kolera suspettati fil-Jemen ( li qed ibati taħt l-effetti tal-gwerra) illum qabżu sew il-200,000.
S’issa mietu ’l fuq minn 1,300 bl-effetti tal-kolera fil-Jemen. Kwart ta’ dawn il-mejtin huma tfal u ċ-ċifra tal-mewt mistennija tiżdied fil-jiem li ġejjin.
Intant, iż-żewġ aġenziji tan-NU sostnew li qegħdin jagħmlu kulma jistgħu biex iżommu din l-epidemija milli ‘taċċellera’. Dan fost l-istqarrijiet allarmanti li ‘il-Jemen, issa, qed jiffaċċja l-agħar inċidenza tal-kolera fid-dinja’.
L-istqarrijiet komplew li fi spazju ta’ xahrejn biss, il-kolera infirxet lejn kull zona tal-Jemen li tinsab taħt amministrazzjoni, meta hu kkalkulat li qegħdin ifeġġu madwar 5,000 każ tal-marda kuljum fil-pajjiż.
Is-sistemi rispettivi għas-saħħa, l-ilma u s-sanità fil-Jemen ikkrollaw wara sentejn ta’ gwerra bejn il-qawwiet tal-Gvern – li huma appoġġjati minn koalizzjoni mmexxija mill-Arabja Sawdija – u moviment ta’ ribelli Houthi.
Dawn ir-ribelli qed jikkontrollaw ħafna territorju tal-Jemen li jinkludi l-kapitali, Sanaa.
