L-istess Mangion qal lill-investigaturi li l-pedala tal-gass tal-vettura Ford MK1 weħlet u ma kienx possibbli għalih li jnaqqas il-veloċità. F’kummenti, il-mekkanik ta’ Fanal Racing Team kompla mal-verżjoni taż-żagħżugħ Malti: “Ryan hu xufier tajjeb ħafna, esperjenzat u b’talent ta’ veru. Jekk ħareġ mit-triq sinjal li ma setax jevita l-inċident.”
Mal-verżjoni tal-Maltin komplew ukoll xi spettaturi li qalu li “l-vettura baqgħet sejra dritt barra mit-triq daqs li kieku ma kienx hemm kantuniera.”
Iżda fuq kollox hemm fattur ieħor importanti – l-ispettaturi, inkluż it-tmienja li weġġgħu, mhux suppost kienu fiż-żona fejn seħħ l-inċident. Il-kantuniera fejn seħħ kollox kienet imamrkata bħala żona perikoluża, inkluż b’tabelli li jindikaw lill-pubbliku biex ma jersaqx lejha.
Sadattant jidher li fortunatament qalbet għall-aħjar il-kundizzjoni ta’ tnejn mit-tmien spettaturi li sofrew xi ġrieħi. Mara u tifel ta’ 15-il sena ttieħdu lejn l-isptar b’ħelikopter u t-tifel kellu jiġi operat immedjatament.
