Il-President tal-Istati Uniti, Donald Trump, akkuża lill-President Amerikan ta’ qablu, Barack Obama, li ‘ma għamel xejn’ fir-rigward tal-allegat indħil tar-Russja fl-elezzjoni tas-sena l-oħra li ddeċidiet it-tmexxija tal-Istati Uniti sal-2020.
Trump qed jgħid li Obama kien ‘jaf dwar dawn l-akkużi’ minn ħafna qabel l-elezzjoni Presidenzjali ta’ Novembru, u li hu ‘xorta waħda ma ħax passi xierqa fiċ-ċirkustanzi’.
Il-kummenti ta’ Trump ingħataw wara li deher artiklu fil-Washington Post li qal li Barack Obama ‘kien ilu minn Awwissu (tal-2016) li sema’ dwar is-sehem dirett tal-President (Russu) Vladimir Putin (fil-proċess elettorali tal-Istati Uniti)’.
L-allegat indħil ta’ Moska fl-aħħar elezzjoni għall-Presidenza tal-Istati Uniti ilu suġġett għall-investigazzjonijiet fuq livell għoli min-naħa tal-Amerikani.
Sadanittant, il-President Putin ċaħad kemm il-darba li pajjiżu qatt indaħal fil-proċess elettorali tal-Istati Uniti.
L-artiklu pubblikat fil-Washington Post sostna li l-eks President Obama, f’Awwissu li għadda, kien infurmat ‘minn sorsi fi ħdan il-Gvern tar-Russja’ li Vladimir Putin kien qed ikollu sehem dirett f’kampanja ċibernetika intiża biex tfixkel l-elezzjoni fl-Istati Uniti.
Ir-rapport sostna wkoll li din il-kampanja ‘min-naħa tar-Russi’ kellha l-għan li tagħmel il-ħsara lil Hillary Clinton – il-kandidat tal-Partit Demokratiku għall-Presidenza u r-rivali ewlenija ta’ Trump – minbarra li tgħin biex Donald Trump, il-kandidat Repubblikan, ‘jaċċerta miċ-ċavetta għall-White House’.
Skont il-Washington Post, l-eks President Obama kien involut f’diversi taħditiet sigrieti dwar ‘l-għażliet għall-miżuri punittivi’ fil-konfront tar-Russja, iżda hu, fl-aħħarnett, kellu jikkuntenta b’numru ta’ miżuri simboliċi.
Il-miżuri inkwistjoni kienu jinvolvu t-tkeċċija ta’ 35 diplomat u l-għeluq ta’ żewġ kumplessi tar-Russi – bil-passi inkwistjoni jseħħu f’Diċembru li għadda, ġimgħat wara li kien sar magħruf ir-riżultat tal-elezzjoni għall-Presidenza tal-Istati Uniti.
