Il-Qorti Ewropea tad-Drittijiet Umani deċidiet li l-projbizzjoni għall-velu tal-wiċċ imposta mill-Belġju ma tabbużax il-Konvenzjoni Ewropea għad-Drittijiet Umani.
Id-deċiżjoni tirrigwarda każ li kienu ressqu żewġ nisa li jridu jilbsu l-velu, magħruf bħala niqab, li jgħatti l-wiċċ kollu (ħlief għall-għajnejn) u l-parti ta’ quddiem tal-ġisem.
Kien fl-2011 li l-Belġju ipprojbixxa l-ilbies ta’ veli fil-pubbliku f’każi fejn dawn kienu jaħbu lill-wiċċ parzjalment jew fit-totalità tiegħu. Sadanittant, il-Qorti Ewropea tad-Drittijiet Umani qablet li l-projbizzjoni tiggarantixxi l-kunċett fejn il-membri tas-soċjetà jgħixu flimkien. Ħsieb ieħor, imbagħad, hu ‘għall-protezzjoni tad-drittijiet u l-ħelsien ta’ ħaddieħor’.
Id-deputati Belġjani, fl-2011, approvaw il-projbizzjoni fuq bażi ta’ sigurtà u biex il-pulizija jkunu jistgħu jidentifikaw lin-nies. Intant, uħud kienu anki ressqu l-argument li l-velu inkwistjoni jissimbolizza l-oppressjoni tal-mara.
Il-Qorti Ewropea tad-Drittijiet Umani lanqas ma laqgħet il-każ ta’ mara Belġjana li kkuntestat liġi li tliet muniċipalitajiet Belġjani kienu ressqu, fl-2008, bl-iskop li jipprojbixxu l-velu tal-wiċċ.
