L-attur Amerikan Martin Landau, li jibqa’ magħruf għall-karattru tiegħu fis-sensiela televiżiva Mission Impossible u li kien anki magħruf għar-rwoli f’diversi films tas-snin sittin, miet f’Los Angeles, fl-età ta’ 89 sena.
Dick Guttman, il-pubbliċista ta’ Landau, ikkonferma l-mewta tal-attur veteran li, fl-1995, kien rebaħ il-Premju Oscar għal Best Supporting Actor għall-interpretazzjoni Lugosi (l-attur leġġendarju tal-ewwel films tal-orrur) fil-produzzjoni Ed Wood.
Ir-rapporti qalu li Landau miet minn ‘kumplikazzjonijiet li ma kenux mistennija’ wara li hu kien iddaħħal l-isptar.
Produzzjonijiet oħra li Landau kien involut fihom huma Space 1999 ( għat-televiżjoni) u versjoni partikulari ta’ The Adventures of Pinocchio.
Martin Landau kien imfaħħar ukoll għar-rwol tiegħu fil-film North by Northwest tad-direttur Alfred Hitchcock, iżda hu ma kienx aċċetta r-rwol ta’ Mr Spock fis-sensiela Star Trek u li mbagħad kien għadda lill-attur ( u ħabib ta’ Landau) Leonard Nimoy.
