L-ekscaptain u plejer ta’ Bayern Munich Philipp Lahm ġie vvutat bħala l-aqwa plejer tal-Ġermanja għas-sena 2017.
Id-difensur ġab l-akbar ammont ta’ voti biex spiċċa quddiem Toni Kroos ta’ Real Madrid u quddiem Pierre-Emerick Aubameyang ta’ Borussia Dortmund. Kroos għen lil Real Madrid jirbħu d-‘Double’ matul l-istaġun li għadda hekk kif il-Merengues rebħu l-kampjonat u ċ-Champions League filwaqt li Aubameyang spiċċa bħala l-aqwa skorer tal-Bundesliga.
Lahm irtira mill-futbol f’Mejju li għadda wara karriera twila li fiha rebaħ tmien darbiet il-kampjonat domestiku, sitt darbiet it-tazza domestika Ġermaniża, iċ-Champions League u anke t-Tazza tad-Dinja tal-2014.
Riċentament hu ġie anke nkluż fil-Hall of Fame ta’ Bayern Munich, ftit ġimgħat wara li għen lit-tim tiegħu jirbaħ il-Bundesliga.
Din hi l-ewwel darba li Lahm rebaħ dan l-unur hekk kif fil-passat spiċċa fit-tieni u fit-tielet post.
