Il-UĦM Voice of the Workers ordnat direttivi lill-parkers li jaħdmu mal-kumpanija G4S fl-Isptar Mater Dei. Dan minħabba l-fatt li l-union qed tisħaq li l-kumpanija ma rrikonoxxietx lil UĦM sabiex tirrapreżenta lill-ħaddiema membri fi ħdanha. Dan Fi stqarrija l-UĦM insistiet li dan kollu minkejja l-fatt li għandha l-maġġoranza tal-ħaddiema tal-kumpanija mseħbin magħha.
Fi stqarrija l-Union spjegat li d-direttivi wkoll ġew ordnati għax il-parkers tal-G4S fl-Isptar Mater Dei qed idaħħlu paga differenti minn ħaddiema oħrajn li jagħmlu l-istess xogħol mal-kumpanija. Barra minn hekk, l-istess parkers li jaħdmu fl-Isptar Mater Dei ġew iddiskriminati minn sahra li hi nqas minn dik stabbilita.
Għaldaqstant il-UĦM ordnat lill-parkers fl-Isptar Mater Dei sabiex ma jikkontrollawx il-barriers, ma jirrispondux it-telephone, ma jibgħatux e-mails, ma jiċċekkjawx l-ispazji għal persuni b’diżabbilta’, ma jikkomunikawx max-xufiera, ma jilbsux l-uniformi u ma jilbsux il-fluorescent vest.
L-Union spjegat li malli ġew ordnati dawn id-direttivi, il-management tal-kumpanija G4S bagħat numru ta’ ħaddiema li kienu qed jistrajkjaw lejn id-dar. Iżda il-UĦM Voice of the Workers fil-pront ordnat lill-kumplament tal-ħaddiema li obdew id-direttivi sabiex jibqgħu fejn huma fil-post tax-xogħol.
