Fis-sitt ġurnata tal-Kampjonati Mondjali spikkat l-Amerikana Phyllis Francis li rebħet il-finali tal-400 metru. Hi rreġistrat f’ħin ta’ 49.92’ biex daħlet qabel Salwa Eid Naser tal-Bahrain b’50.06’ u l-Amerikana l-oħra Allyson Felix tal-Istati Uniti li għamlet ħin ta’ 50.08’.
Fil-finali tal-400 metru Hurdles tal-irġiel kien hemm sorpriża minn Karsten Warholm tan-Norveġja li għamel id-distanza fi 48.35’. Fit-tieni post ukoll sorpriża oħra minn Yasmani Copello tat-Turkija fi 48.49’ b’Kerron Clement tal-Istati Uniti fit-tielet post f’ħin ta’ 48.52’.
Fis-shot put tan-nisa kien hemm dominju assolut minn Lijiao Gong taċ-Ċina li rebħet b’tefgħa’ ta’ 19.94 metri biex spiċċat qabel Anita Marton tal-Ungerija b’19.49 metri filwaqt li Michelle Carter tal-Istati Uniti ġiet it-tielet b’19.14 metri.
