Barcelona rnexxielhom isaħħu nofs il-grawnd bl-akkwist tal-midfielder eks plejer Tottenham Paulinho mingħand Guangzhou Evergrande. Il-midfielder ta’ 29 sena ngħaqad mal-klabb Spanjol għal somma ta’ €40 miljun u mistenni jkun preżentat il-Ħamis wara li jagħmel l-eżami mediku. Il-klawsola tiegħu ta’ trasferimenti hi ta’ €120 miljun.
Paulinho hu l-aktar akkwist li sewa flus kemm ilu li Ernesto Valverde ħa t-tmexxija ta’ Barcelona dan is-sajf. Hu se jkun qed jirritorna fl-ewropa wara li telaq lil Tottenham fl-2015 biex mar ma’ Guangzhou Evergrande għal somma ta’ madwar €11-il miljun. Maċ-Ċiniżi, hu rebaħ żewġ kampjonati kif ukoll iċ-Champions League tal-Asja fl-2015.
“Paulinho hu plejer bi kwalità invidwali għolja u importanti kemm għal klabb u għat-tim nazzjonali. Il-prezz li Barcelona ħallsu għalih hu sinjal ta’ rikonoxxenza lil Guangzhou Evergrande. Nawgurawlu li jkollu futur sabiħ,” qal il-kowċ tat-tim Ċiniż Luiz Felipe Scolari.
Il-forma tal-Brażiljan fiċ-Ċina wasslet biex reġa’ ssejjaħ mat-tim nazzjonali ta’ pajjiżu fejn fosthom spiċċa biex skorja tripletta fir-rebħa ta’ 4-1 fuq l-Urugwaj aktar kmieni din is-sena.
Paulinho mhux se jkun disponibbli għat-tieni leg tas-Super Cup Spanjola kontra Real Madrid fis-Santiago Bernabeu l-Erbgħa li ġej.
