Fir-rapport annwali fuq it-traffikar tal-persuni għas-sena 2016 maħruġ mill-Uffiċċju tad-Dipartiment tal-Istat Amerikan, jidher ċar li Malta għandha problema serja ta’ traffikar ta’ persuni u li l-Gvern Malti mhux qed jaħdem biżżejjed biex jiġġieled dan l-abbuż.
Dan ir-rapport jgħid li Malta mhux biss hija pajjiż li fih jaslu persuni li jkunu traffikati għas-sess jew għax-xogħol, imma hija wkoll “sors.” Dan ifisser li minn pajjiżna qed jiġu traffikati persuni lejn pajjiżi oħra.
Ir-rapport isemmi kif fost il-vittmi hemm nisa li jiġu traffikati għal skop ta’ sess u primarjament dawn ikunu ġejjin miċ-Ċina, mill-Ungerija, mill-Polonja, mir-Rumanija, mir-Russja u mill-Ukrajna. Id-Dipartiment tal-Istat Amerikan jirrapporta wkoll li kemm nisa kif ukoll tfal Maltin kienu suġġetti għal traffikar f’Malta stess għal skop ta’ sess.
Jingħad ukoll li barranin partikolarment dawk miċ-Ċina, mill-Indoneżija, mill-Filippini u mill-Vjetnam qed jispiċċaw vittmi ta’ xogħol sfurzat u bil-prekarjat. Nisa mix-Xlokk tal-Asja li jaħdmu fi djar privati, Ċiniżi li jaħdmu f’massage parlors, u nsa miċ-Ċentru u mil-Lvant tal-Ewropa li jaħdmu f’nightclubs qed jiħu sfruttati minħabba l-vulnerabbiltà tagħhom u jispiċċaw vittmi f’attivitajiet varji f’Malta.
Dwar l-immigranti jingħad li madwar 5,000 immigrant irregolari mill-Afrika li jinsabu Malta huma f’periklu li jiġu abbużati u sfruttati fl-oqsma tal-kostruzzjoni, l-ospotalità u f’xogħlijiet oħra privati.
Ir-rapport jikkonferma li f’Malta jsir traffikar “intern,” jiġifieri li l-persuni jinbiegħu f’pajjiżna stess biex jiġu sfruttati sesswalment.
F’analiżi xokkanti tas-sitwazzjoni ta’ pajjiżna, ir-rapport jgħid li, “il-Gvern ta’ Malta mhux qed jimxi mal-istandards minimi biex jiġi eleminat it-traffikar tal-persuni” u meta mqabbla mas-sena ta’ qabel, “il-Gvern investiga u ħa passi kontra numru iżgħar ta’ traffikanti, identifika inqas vittmi, investa inqas flus f’ħidma kontra t-traffikar u m’għamel ebda kampanja edukattiva fuq livell nazzjonali.”
Dawn l-aspetti kollha jerġgħu jitniżżlu fir-rakkomandazzjonijiet li jagħmel ir-rapport lill-Gvern Malti. Ma’ dawn ir-rakkomandazzjonijiet, ir-rapport iħeġġeġ lill-Gvern biex jidentifika nisa li huma vittmi ta’ traffikar ta’ persuni u li jaħdmu fil-prostituzzjoni, kif ukoll tfal li huma vittmi tas-sess ikkumerċjalizzat.
Aspett ieħor li r-rapport jindika li mhux qed issir ħidma biżżejjed fuqu mill-Gvern Malti, huwa dak tal-prosekuzzjoni, jiġifieri l-ħidma tal-pulizija f’dan il-qasam tant sensittiv.
Ir-rapport jgħid li f’Malta kien hemm tnaqqis ta’ ħidma li wassal biex inqas persuni tressqu l-qorti mill-pulizija. F’pajjiżna, skont l-Artiklu tal-Kodiċi Kriminali 248A-G, it-traffikar tal-persuni huwa illegali u miegħu jorbot piena ta’ bejn erba’ snin u 12-il sena ħabs.
Fl-2016 jidher li f’Malta kien hemm biss żewġ investigazzjonijiet u saret prosekuzzjoni fuq żewġ każi. Dan huwa tnaqqis fuq is-sena ta’ qabel meta kienu nfetħu ħames investigazzjonijiet u tressqu għall-prosekuzzjoni seba’ każijiet.
Il-ħidma biex il-Gvern Malti jipproteġi jew joffri għajnuna lill-vittmi tat-traffikar tal-persuni tfissret f’dan ir-rapport bħala “modesta.” Dan ma jawgurax tajjeb, speċjalment fil-kuntest ta’ dak li jgħid l-eks-Segretarju tal-Istat Amerikan John F. Kerry fl-introduzzjoni tiegħu għal dan ir-rapport. Kerry jikkundanna t-tolleranza lejn l-abbuż u jgħid li ma nistgħux nagħlqu għajnejna għal din ir-realtà kiefra.
“Minflok, irridu nistaqsu lilna nfusna – “min jaf kieku dik il-vittma tat-traffikar hija t-tifla tiegħi, jew ibni, oħti, jew hija?”
il-mument talbet kumment mingħand id-Deputat Speaker u Membru Parlamentari Nazzjonalista Claudette Buttigieg, li f’dawn l-aħħar ġranet hi wkoll semmgħet leħinha fuq il-midja soċjali biex tikkundanna l-abbuż tat-traffikar tal-persuni.
“Inħoss diqa kbira meta nisma’ kummenti mingħand nies li mhumiex infurmati fuq x’qed jiġri verament f’pajjiżna u madwar id-dinja. Jaħsbu li min jaħdem fil-prostituzzjoni qed jagħmel dan b’għażla libera. Bħal dak li qallu, din hija xi karriera li kull mara taspira għaliha. Il-maġġoranza assoluta tal-prostituti huma vittmi taċ-ċirkostanzi ta’ ħajjithom u numru kbir minnhom huma vittmi ta’ traffikar tal-persuni.
Meta Joseph Muscat jibki dmugħ tal-kukkudrilli u jgħid li jiddispjaċih għal dawn il-vittmi, nippretendi li hu jagħmel xi ħaġa konkreta biex jiddefendihom. Minflok, hu u sieħbu Konrad Mizzi jaqbżu għal min jisfrutta lil dawn il-vittmi u jagħmel il-flus minn fuqhom.”
