L-ammont ta’ refuġjati mis-Sudan t’Isfel li qegħdin jingħataw il-kenn fl-Uganda issa laħħaq mal-miljun ruħ, skont stqarrija min-Nazzjonijiet Uniti.
Iċ-ċifra tirrifletti l-verità allarmanti dwar il-kriżi umana fir-reġjun li qed tiżviluppa bħala l-agħar waħda għar-refuġjati fid-dinja.
L-Uffiċjali fl-Uganda qalu li ma jistgħux ilaħħqu mal-influss tan-nies li qed jaħarbu mill-gwerra ċivili li għaddejja fis-Sudan t’Isfel. Dan waqt li l-aġenzija għar-refuġjati tan-Nazzjonijiet Uniti ħeġġet biex il-komunità internazzjonali żżid id-donazzjonijiet ta’ fejda u għall-impenn umanitarju.
Fl-aħħar sena, u bħala medja, madwar 1,800 refuġjat kienu qegħdin jaslu, kuljum, fl-Uganda. Dan qalu l-UNHCR fi stqarrija u meta miljun persuna ‘jew aktar’ mis-Sudan t’Isfel qegħdin jingħataw il-kenn fis-Sudan, l-Etjopja, il-Kenja, il-Kongo u r-Repubblika Ċentrali Afrikana.
L-ammont ta’ nies iddisprati li qed jaħarbu mis-Sudan t’Isfel żdied sew wara li żbruffaw mill-ġdid il-battalji f’Juba, il-kapitali ta’ dak il-pajjiż, f’Lulju tal-2016.
Ir-refuġjati li jirnexxilhom joħorġu mis-Sudan t’Isfel qed jirrakkuntaw dwar vjolenza u barbariżmu, meta l-gruppi armati (fis-Sudan t’Isfel) qegħdin jaħarqu d-djar bin-nies ġo fihom waqt li jimmassakraw ċivili quddiem il-familji tagħhom stess.
Rapporti oħra dwar is-sitwazzjoni fis-Sudan t’Isfel irreferew għal ‘każi massiċċi ta’ strupru’ kontra n-nisa u l-bniet, waqt li s-subien f’dak il-pajjiż ‘qegħdin jinħatfu bl-iskop li jkunu ngaġġati għal-lieva sfurzata’.
Il-UNHCR, intant, wissa li ‘peress li r-refuġjati għadhom qegħdin jaslu bl-eluf, fl-Uganda, qegħdin jonqsu dejjem aktar l-ammonti tal-għajnuna li s-servizzi ta’ fejda kapaċi li jipprovdu fiċ-ċirkustanzi’.
Il-flus iġġenerati għall-kriżi lanqas jibdew mal-ispiża meħtieġa biex l-uffiċjali fl-Uganda jieħdu ħsieb ir-refuġjati mis-Sudan t’Isfel u l-komunitajiet lokali li qed jilqgħuhom.
